Toshkent viloyati Ohangaron tumani hokimligi

Tashrif avvalida tuman rahbari politexnikum rahbariyati bilan muloqot qilib, ta’lim muassasasidagi umumiy shart-sharoitlar, o‘quv jarayonining tashkil etilishi hamda moddiy-texnika bazasi bilan tanishdi. Ma’lumki, ushbu politexnikum asosan transport yo‘nalishida malakali mutaxassislar tayyorlashga ixtisoslashgan bo‘lib, bu yo‘nalishda ta’lim berish uchun zarur o‘quv xonalari, amaliyot bazasi va zamonaviy uskunalar mavjud.

O‘rganish jarayonida tuman hokimi amaliyot xonalari va ustaxonalarni ko‘zdan kechirib, u yerda o‘quvchilar uchun yaratilgan qulayliklarga yuqori baho berdi. Xususan, amaliy mashg‘ulotlarni sifatli tashkil etish, nazariyani amaliyot bilan uyg‘unlashtirish orqali raqobatbardosh kadrlar tayyorlashga qaratilgan ishlar ijobiy baholandi.

Muloqot davomida politexnikum rahbariyati tomonidan muassasa hududida joylashgan avtodrom maydonini kengaytirish zarurati mavjudligi, bu esa o‘quvchilarning amaliy ko‘nikmalarini yanada mustahkamlashda muhim ahamiyat kasb etishi ta’kidlandi. Shu bilan birga, mazkur masalani hal etish uchun moddiy jihatdan ko‘mak zarurligi yuzasidan murojaat bildirildi.

Tuman hokimi ushbu muammoni ijobiy hal etish, avtodrom maydonini kengaytirish bo‘yicha aniq chora-tadbirlar ishlab chiqish yuzasidan mas’ullarga tegishli ko‘rsatmalar berdi.