Ohangaron tumani hokimi Doniyor Madirimovning O‘zbekiston Respublikasi Konstitutsiyasi qabul qilinganligining 33 yilligi munosabati bilan BAYRAM TABRIGI
2025-12-05 16:10:00 / Rahbariyatning bayonotlari va nutqlari
Konstitutsiyamiz inson qadrini e’zozlash, jamiyatda adolat, tenglik va erkinlikni ta’minlashga xizmat qiladigan mustahkam huquqiy poydevordir. U mamlakatimizda amalga oshirilayotgan barcha islohotlar, yangilanishlar va taraqqiyot dasturlarining asosiy yo‘naltiruvchisi bo‘lib kelmoqda.
So‘nggi yillarda Konstitutsiyamiz yangi tahrirda qabul qilinib, xalqning irodasi, adolatli va farovon jamiyat qurish yo‘lidagi intilishlari yanada to‘liq aks ettirildi. Inson qadrini ulug‘lash, hududlarni rivojlantirish, aholining turmush darajasi va huquqiy madaniyatini oshirish borasida qator islohotlar amalga oshirilmoqda.
Ohangaron tumanida ham Konstitutsiyamizda belgilangan tamoyillarni hayotga tatbiq etish maqsadida, keng ko‘lamli ishlar amalga oshirilmoqda. Mahallalardagi muammolarni hal qilish, fuqarolar farovonligini oshirish, tadbirkorlikni qo‘llab-quvvatlash, yoshlar va xotin-qizlar uchun imkoniyatlar yaratish borasida sezilarli natijalarga erishilmoqda.
Qadrli yurtdoshlar!
Ushbu qutlug‘ kunda barchangizni Konstitutsiya qabul qilinganining 33 yilligi bilan chin qalbdan tabriklayman. Yurtimiz tinch, rizqimiz barakali, kelajagimiz buyuk bo‘lsin! Barchangizga oilaviy baxt, sihat-salomatlik va omadlar tilayman!
Bosh qomusimiz — adolat va taraqqiyot qomusi bo‘lib, yurtimiz ravnaqi yo‘lida xizmat qilishda davom etsin!