Korrupsiyaning oldini olishga qaratilgan suhbat: davlat xizmatchilari uchun muhim chaqiriq
2025-12-05 11:50:00 / Yangiliklar
Tadbir davomida korrupsiyaviy xatti-harakatlar yuzaga kelishiga olib keladigan omillar, bu kabi jinoyatlarning huquqiy oqibatlari va davlat xizmatchisi munosabatidagi axloqiy me’yorlar atroflicha yoritib berildi.
Uchrashuvda, ayniqsa, tuman hokimligining sobiq xodimi — korrupsion harakatlari uchun huquq-tartibot idoralari tomonidan tezkor tadbir davomida qo‘lga olingan “A.Yo.”ning qilmishi atroflicha muhokama qilindi. Ushbu holat ishtirokchilarga amaliy misol sifatida keltirilib, har qanday qonunbuzarlik, ayniqsa, mansab va ishonchni suiiste’mol qilish kabi jinoyatlar oxiri yaxshilik bilan tugamasligi qat’iy ta’kidlandi.
Davlat xizmatchisi – xalq ishonchini oqlovchi, Vatan oldida mas’uliyatni his etuvchi shaxs bo‘lishi kerak. Tadbir davomida davlat xizmatchilariga halollik, shaffoflik, vijdonan va qonun doirasida faoliyat yuritish zarurligi haqida to‘xtalib o‘tildi.
Profilaktik suhbat ishtirokchilari bunday tadbirlar tizimli ravishda o‘tkazilishi, xodimlar o‘rtasida huquqiy madaniyatni yanada oshirishga xizmat qilishini qayd etishdi.