Ohangaronda O‘zbekiston–Polsha hamkorligida savdo va logistika markazi ochiladi
2025-12-03 14:30:00 / Yangiliklar
Marosimda Toshkent viloyati hokimi Zoyir Mirzayev, Polsha Respublikasi elchixonasi rasmiysi Marian Pshendzeski, shuningdek, jamoatchilik faollari, ishbilarmon doira vakillari hamda nuroniylar ishtirok etdi.
Loyiha uchun ajratilgan yer maydonida zamonaviy logistika infratuzilmasi, sanoat va savdo maydonlari, hududlararo tovar ayriboshlash aloqalarini rivojlantirishga xizmat qiladigan servis ob’yektlari barpo etiladi.
Ta’kidlash joizki, Toshkent viloyatida so‘nggi yillarda xorijiy mamlakatlar bilan savdo-iqtisodiy hamkorlik yuqori sur’atlar bilan rivojlanmoqda.
Xususan, Polsha kabi Yevropa Ittifoqi davlatlari bilan sanoat kooperatsiyasi va investisiyaviy sheriklik yangi bosqichga ko‘tarilmoqda. Qurilayotgan yangi markaz ham ana shu yo‘nalishdagi muhim qadamlardan biri bo‘lib, hududning eksport salohiyatini oshirish, mahalliy va xorijlik hamkorlarning savdo-sotiq munosabatlari uchun qulay sharoitlar, zamonaviy transport-logistika infratuzilmalarini yaratishga xizmat qiladi.
Bunday markazlarning tashkil etilishi viloyatda tovar aylanmasi hajmini kengaytiradi, ishlab chiqarish zanjirlarining barqarorligini ta’minlaydi, yangi ish o‘rinlari yaratilishiga hamda to‘g‘ridan-to‘g‘ri investisiyalar oqimining o‘sishiga zamin yaratadi.