“Ustoz va murabbiylar kuni” munosabati bilan bayram tabrigi
2025-09-30 09:00:00 / Rahbariyatning bayonotlari va nutqlari
Assalomu alaykum, hurmatli ustoz va murabbiylar!
Dunyo tamaddunining beshigi bo‘lgan muqaddas zaminimiz azaldan ilm-ma’rifat maskani, ko‘plab buyuk daholar vatani bo‘lib kelgan. Buyuk tariximizni eslar ekanmiz, vatan va xalqni himoya qilgan mard o‘g‘lonlarimiz ham ilm-ma’rifat egalari ekaniga yana bir bor amin bo‘lamiz.
Ilm va ma’rifat qalblarimizga ustozlarimiz mehnati, matonati orqali singadi. Ajdodlardan meros bo‘lgan ma’naviyatli hayot, ma’rifatli avlodni tarbiyalash eng avvalo siz aziz ustozlarning mashaqqatli, ammo sharafli mehnatingizga bog‘liq. Muallimlikning qadrini hech qanday boylik bilan o‘lchash mumkin emas; uning haqiqiy qimmatini ustoz saboqlarini o‘zlashtirib, ertaga o‘zi ham shogirdlariga ustoz bo‘lgan insongina anglaydi.
Bugun — biz uchun eng ulug‘ va aziz bayram. “Yangi O‘zbekiston tayanchi — siz, aziz ustozlar!” shiori ostida o‘tayotgan bu kun har birimizga ilk maktab ostonasidagi birinchi o‘qituvchimiz mehrga to‘la tabassum bilan qarshi olgan onlarni yodga soladi. Shu qutlug‘ kunda bizga bilim va tarbiya bergan har bir ustozimizga cheksiz minnatdorlik izhor etib, ularning mehnatini yuksak qadrlaymiz.
Aziz ustoz va murabbiylar!
Hurmatli Prezidentimiz ta’lim sohasiga katta e’tibor qaratmoqda, bu yo‘nalishda keng ko‘lamli islohotlar va yangi dasturlar amalga oshirilmoqda. Maktabgacha ta’limdan boshlab, umumiy o‘rta ta’limgacha bo‘lgan tizimni tubdan yangilash, bolalarni maktabgacha ta’limga to‘liq qamrab olish, barcha muassasalarni kompyuter sinflari, toza ichimlik suvi va zamonaviy sanitariya infratuzilmasi bilan ta’minlash, chekka hududlarda bepul avtobuslar yo‘lga qo‘yish kabi qator muhim vazifalar amalga oshirilmoqda. Ta’lim tashkilotlariga xorijiy mutaxassislarni jalb etish, o‘qituvchi va tarbiyachilarni chet ellarda malaka oshirish, maoshlarni ikki baravargacha ko‘tarish kabi choralar ham ustoz nufuzini yuksaltirishga xizmat qilmoqda.
Bu sa’y-harakatlar natijasida ta’lim sifatini oshirish, o‘qituvchilarning ijtimoiy himoyasini mustahkamlash va har bir bolaga zamonaviy bilim olish imkoniyatini yaratish yo‘lida yangi bosqichga qadam qo‘yilmoqda.
Nurota tumanimizda ham bu islohotlar o‘z samarasini bermoqda. Bugungi kunda 52 ta umumiy o‘rta ta’lim maktabi, 1 ta ixtisoslashtirilgan maktab, San’at maktabi va “Barkamol avlod” bolalar maktabida jami 1700 dan ortiq ustoz va murabbiylar farzandlarimiz tarbiyasida fidokorona mehnat qilmoqda.
Quvonarlisi, kuni kecha Nurota tumani 2-umumta’lim maktabi o‘qituvchisi Abduxalimova Mexriniso Abduvaliyevna “Xalq ta’limi fidoyisi” ko‘krak nishoni bilan taqdirlandi. Bu, o‘z navbatida, ustozlarimizga bo‘lgan yuksak e’tibor va hurmatning amaliy ifodasi, ularning mehnatini davlat va jamiyat tomonidan munosib qadrlashning yorqin namunasidir.
Shuningdek, har bir ustozimiz yosh avlodga zamonaviy bilim va ezgu qadriyatlarni singdirib, kelajagi porloq, ma’naviy yetuk avlodni voyaga yetkazishga beqiyos hissa qo‘shmoqda.
Qadrli ustozlar! Sizlarni kasb bayramingiz bilan chin qalbimdan tabriklayman. Xonadoningizda tinchlik va xotirjamlik arimasin, farzand va shogirdlaringiz baxt-saodatini ko‘rib yurish nasib etsin. Mashaqqatli, lekin sharafli mehnatingizda doim omad hamrohingiz bo‘lsin.
Yana bir bor bayramingiz muborak bo‘lsin, aziz ustozlar!