Nurota tumanida soliq va byudjet qonunchiligidagi yangiliklar bo‘yicha o‘quv-seminar o‘tkazilmoqda
2026-01-09 10:35:00 / Yangiliklar
Ushbu o‘quv-seminarda tumanda faoliyat yuritayotgan korxona, muassasa va tashkilotlarning bosh hisobchilari, shuningdek tadbirkorlik sub’yektlari ishtirok etmoqda. Tadbirning asosiy maqsadi soliq qonunchiligiga kiritilgan yangiliklar, byudjet to‘lovlari tartibidagi o‘zgarishlar, soliq imtiyozlari va ulardan samarali foydalanish masalalari yuzasidan ishtirokchilarga batafsil tushunchalar berishdan iborat.
Seminar davomida tuman davlat soliq inspeksiyasi rahbar va mutaxassislari tomonidan soliq hisobotlarini to‘g‘ri yuritish, hisob-kitoblarni o‘z vaqtida amalga oshirish, soliq to‘lovchilarning huquq va majburiyatlari, shuningdek amaldagi qonunchilik talablariga rioya etish masalalari keng yoritib berilmoqda. Amaliy misollar asosida olib borilayotgan tushuntirishlar ishtirokchilar uchun ayniqsa foydali bo‘lmoqda.
Shuningdek, tadbirkorlik sub’yektlarini qo‘llab-quvvatlash, soliq ma’murchiligini takomillashtirish hamda soliq intizomini mustahkamlash masalalariga alohida e’tibor qaratildi. Seminar yakunida ishtirokchilarni qiziqtirgan savollarga mutaxassislar tomonidan batafsil javoblar berildi.
Mazkur o‘quv-seminar tadbirkorlik sub’yektlarining huquqiy va moliyaviy savodxonligini oshirish, soliq sohasidagi qonunchilikdagi o‘zgarishlarni o‘z vaqtida yetkazish hamda davlat organlari va soliq to‘lovchilar o‘rtasida ochiq muloqotni yo‘lga qo‘yishda muhim ahamiyat kasb etadi.