Milliy maqom sanʼati — bebaho meros: Nurotada konsert dasturi
2025-12-23 14:30:00 / Yangiliklar
Nurota tumani Madaniyat markazida Oʻzbek milliy maqom sanʼati markazining Navoiy viloyati hududiy boʻlimi tomonidan milliy musiqa sanʼatini targʻib etishga qaratilgan navbatdagi konsert dasturi boʻlib oʻtdi.
Mazkur madaniy tadbirda xalqimizning ko‘p asrlik maʼnaviy merosi hisoblangan milliy maqom sanʼatining nodir namunalaridan iborat keng qamrovli dastur taqdim etildi. Mohir ijrochilar tomonidan yuksak professional mahorat bilan ijro etilgan maqom kuy-qo‘shiqlari tomoshabinlarda katta taassurot qoldirdi. Har bir asar o‘zida chuqur falsafiy mazmun, milliy ruh va ajdodlarimizdan meros bo‘lib kelayotgan betakror musiqiy an’analarni mujassam etdi.
Konsert dasturi davomida mumtoz musiqa namunalarining tarixiy ahamiyati, ularning yosh avlod ma’naviyatini yuksaltirishdagi o‘rni alohida e’tirof etildi. Tadbir tomoshabinlarga milliy qadriyatlarimiz, boy madaniy merosimiz va maqom sanʼatining beqiyos jozibasini yanada yaqindan his etish imkonini berdi.
Shuningdek, ushbu madaniy tadbir milliy sanʼatimizni asrab-avaylash, uni kelgusi avlodlarga yetkazish, yoshlar ongida milliy o‘zlikni mustahkamlash hamda ularning sanʼatga bo‘lgan qiziqishini oshirishga xizmat qildi. Konsert yakunida tomoshabinlar ijrochilarni qarsaklar bilan olqishlab, tadbir tashkilotchilariga o‘z minnatdorliklarini bildirdilar.