Navoiy viloyati Nurota tumani hokimligi

Avval xabar berganimizdek, Dubay shahrida bo‘lib o‘tgan V yoshlar Para Osiyo o‘yinlarida O‘zbekiston yosh para sportchilari 197 ta medal — 99 ta oltin, 57 ta kumush va 41 ta bronzani qo‘lga kiritib, umumjamoa hisobida 1-o‘rinni egallashgan edi.

Mazkur nufuzli musobaqalarda Navoiy viloyati, Nurota tumani sport bo‘limi o‘quvchisi Asadbek Xojiyev para suzish bo‘yicha 7 ta oltin medalni qo‘lga kiritib, O‘zbekiston yoshlar terma jamoasining umumiy g‘alabasiga munosib hissa qo‘shdi. 
Tarixiy g‘alaba bilan yurtimizga qaytgan tumandoshimiz Asadbek Xojiyev Nurota tumanidagi “Chashma” tarixiy-me’moriy majmuasida tantanali ravishda kutib olindi.

Tadbirida tuman hokimi Azamat Fayziyev, nuroniylar, ustoz-murabbiylar, sportchining oila a’zolari hamda sinfdoshlari ishtirok etib, chempionni yuksak natija bilan samimiy tabriklashdi. 

Tadbir davomida tuman hokimi Azamat Fayziyev so‘zga chiqib, Asadbek Xojiyevning erishgan yutuqlari barchamiz uchun faxr ekani, bu muvaffaqiyatlar kelgusida ham bardavom bo‘lishiga ishonch bildirdi hamda Asadbekka kelgusi musobaqalarda ham ulkan zafarlar tiladi.