O‘zbekiston yosh para sportchilari Osiyoda tarixiy g‘alabaga erishdi
2025-12-15 09:15:00 / Yangiliklar
Joriy yilning 7–14-dekabr kunlari Birlashgan Arab Amirliklarining Dubay shahrida bo‘lib o‘tgan V yoshlar Para Osiyo o‘yinlari O‘zbekiston sporti tarixiga oltin sahifa bo‘lib yozildi. Nufuzli musobaqada 35 ta davlatdan 1500 nafarga yaqin atlet 11 ta sport turi bo‘yicha bahs olib bordi.
O‘zbekiston yosh para sportchilari para yengil atletika, para taekvondo, boccia, para suzish, para armrestling va para pauerlifting yo‘nalishlarida yuqori natija ko‘rsatib, jami 197 ta medal — 99 ta oltin, 57 ta kumush va 41 ta bronzani qo‘lga kiritdi. Ushbu natija bilan terma jamoamiz umumjamoa hisobida 1-o‘rinni egalladi.
Mazkur musobaqalarda Navoiy viloyati vakili nurotalik Asadbek Xojiyev (100 m erkin usulda, S8), (50 m erkin usulda, S8), (100 m batterflyay, S13), (100 m brass, S13) Oltin medalni qo‘lga kiritdi.
Tarixiy g‘alaba bilan Vatanga qaytgan delegatsiya a’zolari “Humo” Toshkent xalqaro aeroportida tantanali ravishda kutib olindi. Shuningdek, poytaxtimizdagi Olimpiya shaharchasida g‘olib va sovrindor sportchilar hamda ularning murabbiylarini taqdirlash marosimi bo‘lib o‘tdi.
Tantanali tadbirda Oliy Majlis Senati Raisi Tanzila Narbayeva, O‘zbekiston Respublikasi Prezidentining sport bo‘yicha vakili Odil Abdurahmonov, O‘zbekiston Respublikasi Prezidenti maslahatchisi, Ijtimoiy himoya milliy agentligi direktori Mansur Olloyorov, O‘zbekiston Sport vaziri Adkham Ikramov, Ijtimoiy himoya milliy agentligi direktorining birinchi o‘rinbosari Shaxnoza Mirziyoyeva, Yoshlar ishlari agentligi direktori Alisher Sa’dullayev, O‘zbekiston Milliy Paralimpiya qo‘mitasi raisi Muxtorxon Tashxodjayev, O‘zbekiston Milliy Olimpiya qo‘mitasi raisining birinchi o‘rinbosari Otabek Umarov, sport jamoatchiligi vakillari hamda ommaviy axborot vositalari xodimlari ishtirok etdi.
Marosimda O‘zbekiston Respublikasi Prezidentining tabrigi o‘qib eshittirildi, sportchilar va murabbiylar erishilgan ulkan g‘alaba bilan samimiy tabriklandi.
Eslatib o‘tamiz, 2021-yilda Bahraynda o‘tkazilgan IV Para Osiyo o‘yinlarida O‘zbekiston terma jamoasi 16 ta medal bilan 6-o‘rinni egallagan edi. Joriy yilgi natija esa yosh para sportchilarimizning salohiyati, matonati va xalqaro sport maydonidagi nufuzini yaqqol namoyon etdi.
Bu g‘alaba — Yangi O‘zbekiston yoshlarining kuchli irodasi, qat’iyati va yuksak maqsadlar sari intilishining yorqin isbotidir.