Bugun Yangi O‘zbekistonni barpo etish, yurtimizni har tomonlama taraqqiy ettirish va xalqimiz farovonligini ta’minlash yo‘lida amalga oshirilayotgan islohotlarning markazida, hech shubhasiz, aynan yoshlar turibdi. Muhtaram Prezidentimiz ta’kidlaganlaridek: “Mamlakatimizning eng katta boyligi, hech qanday oltin yoki moddiy resurslar bilan o‘lchab bo‘lmaydigan beqiyos xazinasi — bu bizning intiluvchan, mard va bilimli yoshlarimizdir!”
Davlatimiz rahbari tomonidan yoshlarga qaratilayotgan yuksak e’tibor va ishonch har bir yigit-qiz uchun ulkan imkoniyatlar eshigini ochib bermoqda. Xususan, Prezidentimizning 2026-yil 24-fevralda yoshlar bilan o‘tkazgan tarixiy ochiq muloqotida yoshlarning ta’lim olishi, kasb-hunar egallashi va o‘z iqtidorini dunyo miqyosida namoyon etishi uchun 32 ta yangi imkoniyat va ulkan tashabbus ilgari surildi. Bu shunchaki raqamlar emas, bu — har bir yoshning taqdirini o‘zgartirishga qaratilgan davlatimizning buyuk g‘amxo‘rligidir.
Biz uchun yoshlar — shunchaki kelajak emas, balki bugungi taraqqiyotimizning asosiy harakatlantiruvchi kuchidir. Shu bois Nurafshon shahrida ham yoshlarni qo‘llab-quvvatlash, ularning muammolarini hal qilish, bandligini ta’minlash hamda bo‘sh vaqtini mazmunli tashkil etishga alohida e’tibor qaratilmoqda.
Yil boshida o‘tkazilgan uyma-uy xatlov jarayonida shahrimizdagi 9 ming 334 nafar yosh to‘liq qamrab olinib, “Yoshlar balansi” shakllantirildi. Bu tizim har bir yoshning ichki dunyosi, qiziqishi va muammosini xonadonbay o‘rganish hamda ularga manzilli ko‘mak ko‘rsatish imkonini bermoqda.
Muhtaram Prezidentimiz ta’kidlaganlaridek, davlat idoralari yoshlarning oldiga chaqirib kelishini kutib o‘tirmasdan, ularning muammolarini joyida hal etishi lozim. Shu tamoyil asosida Nurafshon shahrida har bir yoshning taqdiri va kelajagiga alohida e’tibor qaratilmoqda.
Joriy yilda mahallalardagi hokim yordamchilari ko‘magida birgina so‘nggi 12 oy ichida yosh tadbirkorlarimizga jami 142 million so‘mdan ziyod imtiyozli kredit mablag‘lari ajratilib, yangi ish o‘rinlari yaratildi. Zero, yoshlarni tadbirkorlikka jalb qilish — iqtisodiyotimiz barqarorligi va kelajak taraqqiyotining muhim omilidir.
Qadrli yoshlar!
Bugungi kunda mamlakatimizda ilm-fan va ta’lim sohasida yaratilayotgan keng imkoniyatlar o‘z samarasini bermoqda. Yoshlarimiz xalqaro maydonlarda bilim va salohiyati bilan munosib ishtirok etib, Yangi O‘zbekistonning intellektual salohiyatini namoyon etmoqda.
Sizlarning ilm-fan cho‘qqilarini zabt etayotganingiz Nurafshon shahri va shaxsan men uchun cheksiz faxr manbaidir. Joriy o‘quv yilida shahrimiz maktablarining 16 nafar bitiruvchisi oltin medal, 2 nafar bitiruvchisi kumush medal bilan taqdirlangani bu boradagi yutuqlarimizning yaqqol ifodasidir.
48-maktab bitiruvchilari Azimov Sirojiddin, Serjanov Baxtjan hamda 32-maktab bitiruvchisi Minavvarov Lazizning nufuzli xorijiy oliy ta’lim muassasalariga grant asosida o‘qishga qabul qilingani ham shahrimiz ta’lim tizimida amalga oshirilayotgan islohotlarning amaliy natijasidir.
O‘tgan o‘quv yilida shahrimiz maktablarini 576 nafar bitiruvchi tamomlagan bo‘lib, ularning 368 nafari oliy ta’lim muassasalari talabasi bo‘lgan edi. Joriy yilda esa Nurafshon shahri maktablarini qariyb 617 nafar o‘quvchi bitirmoqda. Quvonarlisi, ularning 14 nafari kirish imtihonlarini kutmasdan turib, muddatidan oldin talaba bo'ldi. Ushbu yoshlarning 3 nafari xorijiy oliy ta’lim muassasalariga grant asosida qabul qilindi.
Prezidentimiz tomonidan sport sohasiga qaratilayotgan yuksak e’tibor va yaratilayotgan keng imkoniyatlar natijasida Rajabova Nazokat va Abdullajonova Maftuna o‘zbek jang san’ati bo‘yicha jahon va Osiyo chempionatlari g‘olibasi bo‘lishga erishdi. Shuningdek, Abdujabborov Hasan va Abdujabborov Husan, Ahmedova Parizoda hamda Furqatov Ja’far akademik eshkak eshish va yunon-rum kurashi bo‘yicha O‘zbekiston chempionatlari hamda respublika musobaqalarida yuqori natijalarni qayd etib, shahrimiz nufuzini yanada yuksaltirmoqdalar.
Shuningdek, “Besh tashabbus olimpiadasi” musobaqalarida ishtirok etish uchun 24 mingdan ortiq ariza kelib tushgani yoshlarimizning sport, madaniyat, san’at, kitobxonlik va intellektual yo‘nalishlarga bo‘lgan qiziqishi yuksak ekanligini yaqqol namoyon etmoqda.
Shuningdek, shahrimiz vakili, Nurafshon mahallasidan Sheraliyeva Maftuna “Yoshlar ovozi” tanlovining viloyat bosqichida g‘olib bo‘lib, respublika bosqichiga yo‘llanmani qo‘lga kiritdi.
Shahar hokimi volontyorlari safidagi 131 nafar faol yoshlarimiz shahrimizni obodonlashtirish, ijtimoiy loyihalarni amalga oshirish hamda aholiga ko‘mak berish ishlarida munosib hissa qo‘shib kelmoqda.
Aziz yoshlar!
Muhtaram Prezidentimiz ta’kidlaganlaridek: “Bilimli avlod — Yangi O‘zbekistonning mustahkam poydevoridir.” Sizlar nafaqat bugungi kunning, balki mamlakatimizning ertangi taraqqiyoti va kelajagi uchun mas’ul avlodsiz.
Biz sizlarning bilimingiz, g‘ayratingiz, tashabbuskorligingiz va vatanparvarligingiz bilan faxrlanamiz. Hech qachon bilim olishdan to‘xtamang, katta maqsadlar sari dadil intiling, o‘z ustingizda muntazam ishlang. Ishonchim komilki, Nurafshon yoshlari o‘zining bilim-zakovati, mehnatsevarligi va yuksak fuqarolik pozitsiyasi bilan Yangi O‘zbekiston taraqqiyotiga munosib hissa qo‘shadi.
Yana bir bor barchangizni Yoshlar kuni bilan samimiy tabriklayman. Sizlarga mustahkam sog‘liq, oilaviy baxt, o‘qish va mehnat faoliyatingizda ulkan muvaffaqiyatlar, ezgu orzu va maqsadlaringiz ro‘yobini tilayman.