“So‘nggi qo‘ng‘iroq” — katta hayot sari muhim qadam
2026-05-25 14:05:00 / Yangiliklar
Bugun, 25-may kuni mamlakatimizdagi barcha umumta’lim maktablarida 2025–2026-o‘quv yili yakunlanib, “So‘nggi qo‘ng‘iroq” tadbirlari bo‘lib o‘tdi.
Shu munosabat bilan Nurafshon shahridagi 57-son umumta’lim maktabida ham bitiruvchilar uchun tantanali bayram dasturi tashkil etildi. Tadbirda Nurafshon shahar hokimi Ilxom Klichxanov ishtirok etib, bitiruvchilarga Oʻzbekiston Respublikasi Prezidenti nomidan yo‘llangan tabrikni o‘qib eshittirdi.
Shuningdek, o‘quv yili davomida bilimga chanqoqligi, izlanuvchanligi hamda faolligi bilan ajralib turgan o‘qituvchi va o‘quvchilar “Ta’lim iftixori” nominatsiyasi hamda “Nurafshon shahar hokimi stipendiyasi” bilan taqdirlandi. G‘oliblarga mos ravishda 7 million va 5 million so‘mlik pul mukofotlari topshirildi.
✅ 2025–2026-o‘quv yilida Nurafshon shahridagi 13 ta umumta’lim maktabining 9-sinfini 871 nafar o‘quvchi tamomlamoqda. Shundan 22 nafari a’lo darajadagi shahodatnomaga sazovor bo‘ldi. 11-sinfni esa 649 nafar bitiruvchi yakunlamoqda. Ulardan 16 nafari oltin medal, 2 nafari kumush medal bilan maktabni bitirmoqda. Qolaversa, 12 nafar bitiruvchi muddatidan oldin talabalik baxtiga muyassar bo‘ldi.
Tadbir davomida erishilgan natijalar alohida e’tirof etilib, bitiruvchi yoshlarga kelgusi hayot yo‘lida omad, ulkan zafar va muvaffaqiyatlar tilandi.