Qurbon hayiti yaqinlashar ekan, Norin tumanida xayrli va savobli tadbirlar keng quloch yozmoqda.
2026-05-13 11:25:00 / Yangiliklar
Ana shunday ezgu ishlardan biri sifatida tuman Yoshlar ishlari bo‘limi tashabbusi bilan Zarbdor mahallasidagi “Qardoshlik” qabristonida obodonlashtirish hashari o‘tkazildi.
Tadbir davomida qabriston hududi tozalanib, begona o‘tlardan xalos etildi, atrof muhiti tartibga keltirildi. Hasharda mahalla faollari, nuroniylar, yoshlar hamda keng jamoatchilik vakillari faol ishtirok etdi.
Yurtimizda muqaddas qadamjolarni e’zozlash, ajdodlar xotirasiga hurmat ko‘rsatish azaliy qadriyatlardan biri hisoblanadi. Ayniqsa, muborak ayyomlar arafasida qabristonlarni obod etish xalqimizga xos ezgu an’analarning amaliy ifodasidir.
Ayni kunlarda tumanning turli hududlarida joylashgan qabristonlarda ham keng ko‘lamli hashar va obodonlashtirish ishlari izchil davom ettirilmoqda. Bu kabi tadbirlar aholi o‘rtasida hamjihatlik va bag‘rikenglik muhitini yanada mustahkamlashga xizmat qilmoqda.