PAXTASHILIQTA KESHIKTIRILMEYTUǴIN AGROTEXNIKALIQ ILAJLARDI SISTEMALI HÁM ÓZ MÚDDETINDE ÁMELGE ASIRIP, JOQARI ÓNIM HÁM DÁRAMAT ALIW USHIN PUQTA TIYKAR JARATIŃ!
Nókis rayonı fermerler keńesiniń fermerlerge
múrájat
Húrmetli fermerler,
Awıl xojalıǵı tarawında ámelge asırılıp atırǵan keń kólemli reformalar awıl xojalıǵı óndirisshileriniń máplerin arttırıw, suw hám jer resurslarınan aqılǵa uǵras paydalanıw, óndiriske zamanagóy texnologiyalardı jedel engiziw, nátiyjeli qarjılay qollap-quwatlaw arqalı diyqan hám fermerlerdiń awırın jeńilletiwge qaratılmaqta.
Atap aytqanda, Mámleketimiz basshısınıń 2026-jıl 8-maydaǵı "Ǵawasha hám biyday jetistiriwshilerdi qarjılay qollap-quwatlawdıń qosımsha ilajları haqqında"ǵı PP-82-sanlı Pármanı menen Siz fermer hám klasterlerge bir qatar jeńillikler berildi.
birinshiden, shártnamada belgilengen múddette qaytarǵan xojalıqlarǵa usı kreditler boyınsha tólengen procent tóleminiń 2,5 procentin, ónim jılı juwmaǵına shekem (tiyisli jıldıń 31-dekabrine shekem) qaytarǵan xojalıqlarǵa usı kreditler boyınsha tólengen procent tólemleriniń 5 procentin jáne biyday jetistiriw qárejetleri ushın ajıratılǵan jeńilletilgen kreditlerdi ónim jılı 1-avgustına shekem tolıq qaytarǵan xojalıqlarǵa usı kreditler boyınsha tólengen procent tóleminiń 
4 procentlik punkt qarjıları fermer xojalıqlarına qaytarıp beriledi, yaǵnıy, Siz fermerlerdiń qarjıları únemlenip, ekonomikalıq imkaniyatlarıńız artıp atır;
ekinshiden, dizel janılǵısın satıp alıwǵa baylanıslı qárejetlerdi bir bólegin qaplaw maqsetinde 2026-jıl 1-aprelden 2026-jıl 1-iyulǵa shekem awıl xojalıǵı kárxanaları tárepinen birja sawdaları arqalı satıp alınǵan hár bir tonna dizel janılǵısınıń bahasınıń 13 million sumnan asqan bólegi ushın, biraq 2 million sumnan kóp bolmaǵan muǵdarda Ózbekstan Respublikası respublikalıq byudjeti esabınan Agentlik arqalı subsidiya ajıratıladı;
úshinshiden, paxta shiyki zatın satıp alıw ushın paxta-toqımashılıq klasterleri jáne paxta shiyki zatın qayta islew hám iyirilgen jip islep shıǵarıw shınjırına iye toqımashılıq kárxanalarına ajıratılǵan kommerciyalıq kreditler boyınsha tólengen procent tóleminiń 8 procentlik punktten joqarı, biraq 
16 procentlik punktten artpaǵan bólegin qaplap beriw boyınsha klasterlerge jeńillikler berildi.
Paxtashılıqta joqarı zúráát alıw, bárinen burın, diyqan hám fermerler, paxta klasterleri jáne taraw pidayılarınıń kúni-túni islengen mashaqatlı miynetiniń, sonday-aq, puqta oylanǵan reformalar hám ilimiy qatnaslar tiykarında óz nátiyjesin beretuǵının hámmemiz sezip turmız.
Usı jılı rayon boyınsha 1 mıń 700 gektar maydanlarda sonnan, 
455 gektardan aslamı Shinjon usılında shigit egip, joqarı zúráát alıw boyınsha atızlarda qızǵın jumıs alıp barılmaqta.
Bárshemiz jaqsı túsinemiz, házirgi oǵada qıyın klimat sharayatında kóplegen sınaq hám qıyınshılıqlarǵa qaramastan, ásirese, bıyıl iyun-iyul ayları hár jılǵıdan da jawınlı hám oǵada ıssı keliwi kútilip atırǵanı biz diyqan-fermerler hám klaster kárxanaları tárepinen hár qashanǵıdan da kóbirek juwapkershilik penen miynet etiwdi dáwir talap etpekte.
Áziz fermerler!
Keliń, elimizdiń rawajlanıwı ushın birgelikte háreket eteyik, 2026-jıl 
1-iyunnan baslap "Áhmietli 30 kúnlik" dawamında agrotexnikalıq ilajlardı shın kewilden ámelge asırıp, joqarı zúráát hám joqarı dáramat ushın puqta tiykar jaratayıq!
Bunıń ushın hár bir fermer xojalıǵı óz atızında bolıp, ǵawashanı qayta islew, tárbiyalaw baǵdarında taraw ilimpazları, qánigeleri hám tájiriybeli ustaz fermerlerdiń usınısı tiykarında sistemalı jumıslardı shólkemlestiriw zárúr boladı. Xalqımız Sizdey miynetkesh diyqan hám fermerler, sheber suwshı hám irrigatorlar, óz isiniń haqıyqıy ustası bolǵan mexanizator hám agronomlar, jankúyer ilimpaz hám izertlewshiler, klaster xızmetkerleri tımsalında mine usınday pidayı insanlardı kóredi hám el-jurt dasturxanın molshılıq etiw jolındaǵı abıraylı hám ullı miynetińizdi joqarı qádirleydi.
Joqarıdaǵılardan kelip shıǵıp, ǵawashanıń joqarı zúráátin alıw ushın iyun-iyul aylarında, yaǵnıy usı jıldıń 1-iyuninan - 1-iyulge shekem "Áhmietli 30 kúnlik"te Siz fermerler tárepinen agrotexnikalıq ilajlardı ámelge asırıw zárúrligi qosımsha dáramat alatuǵının júrekten sezinip, tómendegi ilajlarǵa hár qashanǵıdan da zıyat juwapkershilik penen qatnas jasawıńız soraladı:
birinshiden, paxta atızlarıńızdı jabayı shóplerden tazalawdı shólkemlestiriń, bunıń ushın bárinen burın barlıq jumısshılarıńızǵa sharayat jaratıp, súrimshilerdi atızǵa mobilizaciya etiń hám hár bir fermer xojalıǵı paxta hám ǵálle maydanları átirapın jabayı shóplerden, shóp-sharlardan tazalaw, atız mádeniyatına ámel etiń;
ekinshiden, shet el sortı egilgen (eki genli) maydanlarǵa tolıq glifosat sebiwdi shólkemlestiriń, bunıń ushın birinshi glifosat preparatınıń rezervin jaratıń hám de bar 6 dana OVX purkashların atızǵa shıǵarıń;
úshinshiden, sozılmalı jawın-shashınnan keyin hawa almasıwı jamanlasqan hám ashshı ızǵar kóbeygen maydanlarda dala sharayatınan kelip shıǵıp, qatar araların 30-35 sm tereń jumsartıw hám 10-16 sm tereńlikte (kultivaciya) islew;
Qator araların kultivaciyalawda traktorlardı tómen tezlikte, bir tegislikte júrgiziń;
18 dana tereń jumsartqıshlar hám 30 dana kultivatorlardı tolıq atızǵa mobilizaciya etiń. Olardıń jumis ónimdarlıǵın arttırıń;
Mexanizatorlar ushin atızdıń ózinde qolay sharayatlar jaratıp beriń (ishimlik suwı, ıssı awqat, shay hám t.b.);
tórtinshiden, ǵawasha maydanların azotlı mineral tóginler menen gektarına 250 kg nan ekinshi azıqlandırıw jumısların ámelge asırıń;
Bunıń ushın talap etiletuǵın 425 tonna azotlı tóginler rezervin tolıq jaratıw.
Ǵawasha maydanların gektarına 200 kg nan azotlı mineral tóginler menen úshlemshi azıqlandırıw jumısların ámelge asırıń hám talap yetetuǵın mineral tóginler zapasın jeterli muǵdarda jaratıw ilajların kóriń.
besinshiden, Ǵawasha maydanlarında shire-tripslerge qarsı gúresiw ilajların alıp barıw;
Ǵawasha maydanların óz aldına qadaǵalawǵa alıp, shira-trips tarqalgan maydanlardı biologiyalıq qayta islewlerden ótkeriń;
Zıyankes normadan kóp bolsa ximiyalıq gúresiw sharaların qollanıń;
Órmekshi qurtına qarsı profilaktikalıq gúresiw ilajların ámelge asırıń;
Ǵawashanıń ósiw dáwirinde kúkirt untaǵın shańlatıw, 0,5-1° OOQ qaynatpası (ISO) menen islew beriń hám órmekshi kene tarqalıwı qáwipi bar bolǵan ǵawasha maydanların suwǵarıw normasın qadaǵalawǵa alıń;
Órmekshilerdiń tarqalıwı boyınsha paxta maydanlarında baqlaw-qadaǵalaw jumısların alıp barıń, zıyankes anıqlanǵanda arnawlı akarisidler menen ximiyalıq islewler ótkeriń;
altınshıdan, ǵawashanı stressten shıǵıwı hám rawajlanıwın jedellestiriw maqsetinde 1700 gektar maydanǵa iyun ayında keminde eki márte tolıq aminokislotalar, mikroelementler hám biologiyalıq belsendi kompleksler saqlawshı preparatlar hám karbomidli suspenziya sebiwdi ámelge asırıw;
Jetinshiden, ǵawashanıń ǵawlap ketiwiniń aldın alıw, buwın aralıǵın 3-4 sm den asırmaw hám de zúráát alıwdı tezlestiriw maqsetinde 4-5-shin japıraq dáwirindegi ǵawashaǵa 5-6 gr, al, búrshileniw dáwirinde bolsa 10-15 gr nan ósiwdi basqarıwshı (Entojean, Sojean) preparatları menen islew ótkeriń;
Segizinshiden, Suw jetispewshiligin esapqa alǵan halda hár bes gektar maydanǵa birewden sherbet uraların (qándek) qazıw, gektarına
5 tonnadan jámi 400 mıń tonna jergilikli tóginlerdi atızģa shigarıp, tek sherbet usılında suwģarıwdı shólkemlestiriń;
Suwǵarıw jumıslarına suwshılardı tolıq tartıp, suwǵarıw jumısların aqırǵı qulaqtan gezekpe-gezek shólkemlestirip, fermerbay sistemasında hám tek ǵana sherbet usılında suwǵarıw jáne túngi suwǵarıw jumıslarına ayrıqsha itibar qaratıń;
Suwgariw jumıslarında qatnasatuģın suwshılarģa qolaylı sharayatlar jaratıp beriń (ishimlik suwı, ıssı awqat, shay hám t.b.);
toǵızınshıdan, Shinjon usılında egilgen maydanlarda tamshılatıp suwǵarıwdı engiziń;
onınshıdan, ǵawashanıń 2-3 shın japıraq shıǵarǵanında organikalıq biopreparatlar, ximiyalıq zatlar (gumin, gumimaks, NVK, ifo, PZN, Bioduks hám basqalar) biologiyalıq stimulyatorlar menen qosımsha islew beriń, ǵawashanıń erte pisetuǵınlıǵın hámde paxtadan 50 centner ónim alıwǵa erisiń;
on birinshiden, Bar 1 biolaboratoriyańızda biomaxsulotlardı sapalı hám úzliksiz kóbeytiw ushın azıqlıq rezervin jaratıń,
Onda, iyun ayında 5,1 kg Trixogramma, 5,1 mln Altınkóz hám 1,7 mln Brakon entomofagların kóbeytip, profilaktika maqsetinde atız shetlerine gektar esabında 1000-2000 danadan (10X10 sxemada 100 noqatqa) altınkóz entomofagın;
Ǵórek qurtınıń hárbir áwladınıń máyeklerine qarsı trixogrammanı 3-4 kún aralap 3 ret 1 grammnan (5X5 sxemada gektariga 400 noqatta) tarqatıń;  
on ekinshi, hár bir fermer xojalıǵınıń basshısı paxtashılıq klaster kárxanaları menen birgelikte jumıslardı jáne de jedellestirip, joqarıdaǵı ilajlardı ámelge asırıp, bıyıl ǵawasha zúráátin 50 centner joqarı alıp, joqarı dáramat alıwǵa erisiń hám Prezidentimiz qararında belgilengen jeńilliklerden paydalanıń.
Húrmetli klaster kárxanalarınıń basshıları!
Sizlerdiń itibarǵa ılayıq dárejedegi biznes rejelerińiz tiykarında, bir neshe jıllar tek shiyki zat sıpatında satılǵan talshıqlarımız, búgingi kúnde qayta islenip, tayar ónim bolıp milliy ekonomikamızdıń ósiwine hám eksport potencialımızdı bekkemlewge xızmet etpekte.
Qalaberdi, Sizlerdiń rejelerińizdiń áhmietli faktorı jetistirilgen zúrááttiń óz waqtında, sapalı jıynap alınıwına baylanıslı.
Fermer xojalıqlarına ǵawashanı tárbiyalaw hám onıń agrotexnikasında finanslıq járdemińizdi ayamasanız, gúzde bunıń óz jemisin kóriwdi umıtpań. 
Qádirli fermerler!
Bıyıl da awıl xojalıǵı tarmaqlarında joqarı zúráát jetistiriw ushın házirden-aq puqta tiykar jaratılıwı kerek. Joqarıda atap ótkenimizdey, ǵawasha atızlarında agrotexnikalıq ilajlardı qısqa múddetlerde, sapalı etip juwmaqlaw ilajların kóriw usı kúnniń áhmietli wazıypası bolıp tabıladı.
Bársheńizdi usı iygilikli iske qatnasıwǵa shaqırıp, ekonomikamızdı kóteriwge, ana jurtımızdıń jáne de abat bolıwı ushın múnásip úlesińizdi qosıwǵa jáne "Áhmietli 30 kúnlik" dawamında paxtashılıqta keshiktirip bolmaytuǵın agrotexnikalıq ilajlardı sistemalı hám óz múddetlerinde ámelge asırıwǵa shaqıramız!

Nókis rayonı fermerler keńesi