Qoraqalpog‘iston Respublikasi Nukus shahri hokimligi

2026 yil 18 sentyabr, Nukus shahri hokimligi Matbuot xizmati

2026 yil davomida Nukus shahrida ijtimoiy himoyaga muhtoj, kam ta'minlangan oilalarni qo‘llab-quvvatlash tizimi butunlay yangi bosqichga ko‘tarildi. Bu borada amalga oshirilgan manzilli yordamlar va ko‘rsatilgan xizmatlar haqida ochiq muloqot o‘tkazildi.

Bugungi kunda Respublikamizda ijtimoiy himoya sohasida amalga oshirilayotgan islohotlar, aholining yordamga muhtoj qatlamlarini qo‘llab-quvvatlash va inson qadrini ulug'lashga qaratilgan tizimli ishlar izchil olib borilmoqda.

Ayniqsa, bu yo‘nalishda olib borilayotgan ishlar alohida ahamiyat kasb etmoqda. Unda nogironligi bo‘lgan shaxslar, kam ta'minlangan oilalar, yolg'iz keksalar, bolalar va ijtimoiy himoyaga muhtoj boshqa toifadagi fuqarolar uchun manzilli, shaffof va samarali ijtimoiy xizmatlar ko‘rsatish yo‘lga qo‘yilgan.

Songgi yillarda ijtimoiy xizmatlarni raqamlashtirish, “Inson” ijtimoiy xizmatlar markazlari faoliyatini kengaytirish, ijtimoiy xodimlar institutini joriy etish hamda profilaktika va erta aniqlash mexanizmlarini kuchaytirish bo‘yicha muhim qadamlar qo‘yildi. Bu islohotlar aholining davlatga bo‘lgan ishonchini mustahkamlashga, ijtimoiy adolatni ta'minlashga xizmat qilib kelmoqda.

Bugungi kunda ijtimoiy himoyani mahalla darajasida tashkil etish, ijtimoiy xizmat va yordamlarni kompleks yondashuv asosida ko‘rsatish, aholining og'ir ijtimoiy ahvolga tushib qolishining oldini olish, shuningdek, ijtimoiy himoyaning manzilliligi va samaradorligini oshirish hamda yordamga muhtoj qatlamning sotsiolizatsiyalashuvini (jamiyatga moslashuvini) ta'minlash maqsadida Nukus shahri “Inson” ijtimoiy xizmatlar markazi tomonidan 2026 yil davomida mahallalarda bir qator ishlar amalga oshirildi.   

Nukus shahri bo‘yicha 350 ming 400 nafar aholi, 110 ming 737 ta oila va 89 ming 310 ta xonadonda istiqomat qiladi. Ushbu oilalar 71 ta mahalla fuqarolar yig'ini hududida yashaydi. Mahallalarga kompleks xizmat ko‘rsatuvchi 71 nafar ijtimoiy xodim biriktirilgan. Ushbu ijtimoiy xodimlar tomonidan 2026 yilning 1 yanvaridan buyon fuqarolar 22 ming 820 ta xizmat turlari bilan qamrab olindi.

Yordamga muhtoj oilalarni aniqlash natijalari
Shahar bo‘yicha 8 552 ta oila, ya’ni aholining 7,7 foizi "Ijtimoiy reestr"ga kiritilgan. Ta'kidlash joizki:

Reestrga kiritilgan 8 552 ta oilaning 3 972 tasi davlat ta'minotidagi, 3 580 tasi kambag'al oilalar, 1 000 tasi esa kambag'allik chegarasidagi oilalar hisoblanadi.

Ushbu oilalarning jami a'zolari 34 321 nafarni tashkil etib, shundan 16 134 nafari erkaklar va 18 187 nafari xotin-qizlardan iborat.

Joriy yilning 1 yanvaridan boshlab oilalar va shaxslarni xonadonbay o‘rganish natijasida ijtimoiy yordamga muhtoj shaxslar va oilalar bo‘yicha jami 4 641 ta keys ochildi.

Ochilgan keyslar toifalari:

Etim bolalar, ota-ona qaramog'idan mahrum bo‘lgan hamda to‘liq bo‘lmagan oilalardagi bolalar — 148 ta holatda;

Kam ta'minlangan oilalar — 2 955 ta holatda;

Muayyan yashash joyiga ega bo‘lmagan shaxslar — 5 ta holatda;

Nogironligi bo‘lgan shaxslar, og'ir xastalikka chalinganlar, shuningdek, jismoniy, aqliy, sensor yoki ruhiy nuqsonlari bo‘lgan hamda uzoq vaqt davolanishga muhtoj bolalar — 573 ta holatda;

Ozodlikdan mahrum qilish jazosini o‘tab bo‘lganlar — 3 ta holatda;

Ota-ona qaramog'idan mahrum bo‘lgan, nazoratsiz va qarovsiz qolgan bolalar — 94 ta holatda;

Ota-onalik huquqidan mahrum qilinmasdan farzandlari olib qo‘yilgan ota-onalar — 3 ta holatda;

Ota-onasi xorijga, shu jumladan, tashqi mehnat migratsiyasiga ketgan bolalar — 29 ta holatda;

Tazyiq va zo‘ravonlikka uchragan xotin-qizlar va ularning voyaga etmagan farzandlari — 580 ta holatda;

Texnogen, tabiiy va ekologik xususiyatli favqulodda vaziyatlardan jabrlangan shaxslar — 2 ta holatda;

Boshqalarning parvarishiga muhtoj bo‘lgan yolg'iz yashovchi hamda yolg'iz keksalar va nogironligi bo‘lgan shaxslar — 249 ta holatda.

Ta'lim va to‘garaklarga qamrab olish
Hududdagi "Ijtimoiy reestr"ga kiritilgan oilalarning 1 263 nafar maktabgacha yoshdagi farzandlari maktabgacha ta'limga qamrab olingan bo‘lsa, 7–18 yoshdagi 2 313 nafar boladan 1 185 nafari turli to‘garaklarga jalb etildi.

Aholiga referal xizmatlar ko‘rsatish bo‘yicha jami 1 183 ta talabnoma shakllantirilib, shundan 589 tasi Kambag'allikni qisqartirish va bandlik bo‘limiga, 169 tasi Yoshlar agentligi tuman bo‘limiga, 128 tasi tibbiyot birlashmasiga va 297 tasi boshqa tashkilotlarga yuborildi.

Moliyaviy va moddiy qo‘llab-quvvatlash
"Davlat ta'minotidagi oilalar"ga qo‘shimcha ravishda 74 nafar shaxsga 1 mlrd 100 mln so‘m miqdorida foizsiz kreditlar ajratildi; 48 ta turar joy 2,5 mlrd so‘m mablag' hisobidan "Uy-joyni yashil ta'mirlash" dasturi asosida ta'mirlandi. Shuningdek, 987 ta oilaga bolalar nafaqasi, 316 ta oilaga parvarishlash nafaqasi tayinlandi.

Bundan tashqari, 1 607 nafar shaxs ijtimoiy sug'urta bilan qamrab olindi hamda 367 ta xonadonga artezian qudug'i qazish, suv filtri va suv nasisini o‘rnatish bo‘yicha amaliy yordam ko‘rsatildi.

"Saxovat va ko‘mak" jamg'armasi orqali jami 4 872 nafar fuqaroga 5 mlrd 961 mln so‘mlik yordam ko‘rsatildi. Shu jumladan:

Oziq-ovqat bilan ta'minlash uchun — 2 985 nafar fuqaroga 1 mlrd 231 mln so‘m;

Turar joyini ta'mirlash uchun — 48 nafar fuqaroga 827,8 mln so‘m;

Kiyim-kechak bilan ta'minlash uchun — 1 788 nafar fuqaroga 3 mlrd 687,6 mln so‘m;

Xirurgik amaliyot va davolanish uchun — 10 nafar fuqaroga 173,8 mln so‘m;

Kommunal qarzdorlikni qoplash uchun — 35 nafar fuqaroga 14,9 mln so‘m;

Ijara xarajatlarini qoplash uchun — 6 nafar fuqaroga 25,2 mln so‘m.

Nogironligi bo‘lgan shaxslarni qo‘llab-quvvatlash va inklyuziv ta'lim
Ijtimoiy reestrga kiritilganlar orasida 1 852 nafar og'ir xastalikka chalingan shaxs aniqlangan. 471 nafar nogiron bolaning onasi ularga qarovchi sifatida ro‘yxatga olingan. Jami 2 097 nafar nogironligi bo‘lgan shaxs aniqlandi, shundan:

1-guruh — 231 kishi;

2-guruh — 1 257 kishi;

3-guruh — 113 kishi;

Bolalikdan nogiron — 496 kishi.

Oilalar kesimida:

Oilada 2 nafar nogironligi bo‘lganlar — 189 ta oila;

Oilada 3 nafar nogironligi bo‘lganlar — 22 ta oila;

Oilada 4 nafar nogironligi bo‘lganlar — 2 ta oila aniqlangan va ushbu oilalar ijtimoiy xodimlar bilan qamrab olingan.

Hozirgi kunda "Kunduzgi qarov xizmati"ga 67 nafar nogironligi bo‘lgan bola qamrab olindi.

"Faol hayotga qadam" dasturi doirasida 117 nafar shaxs xizmatlar bilan qamrab olindi, 35 nafar fuqaroga tibbiy-ijtimoiy xizmatlar ko‘rsatildi. 12 nafarining salomatligi tiklandi, 11 nafar yolg'iz keksaning sog'lig'i yaxshilandi.

920 nafar fuqaro adaptiv sportga jalb etildi.

Nogironligi bo‘lgan yoshlarning 17 nafari kasb-hunar kollejida, 7 nafari esa Oliy ta'lim muassasasida bilim olmoqda.

Nukus shahri bo‘yicha 23 ta maktabda 99 ta inklyuziv sinflar tashkil etilgan. Shundan 8 ta maktabda to‘siqsiz muhit yaratilib, 23 ta korrektsion sinf faoliyati yo‘lga qo‘yilgan. Jami 169 nafar bola inklyuziv ta'limga qamrab olindi.

Moslashtirish va huquqiy yordam ko‘rsatish
Tazyiq va zo‘ravonlikka uchragan 314 nafar xotin-qizga psixologik, huquqiy va ijtimoiy yordam ko‘rsatildi. Shundan 40 nafar xotin-qiz "Xotin-qizlarni reabilitatsiya qilish markazi"ga, 52 nafari esa "Birlamchi yordam" xonalariga joylashtirildi.

Jazoni ijro etish muassasalaridan ozod etilganlarni jamiyatga moslashtirish va ijtimoiy qo‘llab-quvvatlash maqsadida amaliy ishlar olib borildi. Jami 75 nafar jazoni o‘tab qaytgan shaxs bilan ish olib borilib, ularning hammasiga bir martalik moddiy yordam ko‘rsatildi, 7 nafarining bandligi ta'minlandi.

O‘zbekiston Respublikasi Prezidentining 2026 yil 27 apreldagi "Ruhiy holati buzilgan nogironligi bo‘lgan shaxslarga ijtimoiy xizmat ko‘rsatish tizimini yanada takomillashtirish bo‘yicha qo‘shimcha chora-tadbirlar to‘g'risida"gi PF-69-sonli Farmoni ijrosini ta'minlash maqsadida jami 44 nafar fuqaroga tegishli chora-tadbirlar amalga oshirildi.

Shu jumladan: chuqur darajadagi aqliy nuqson tashxisi qo‘yilgan 7 nafar nogironligi bo‘lgan shaxsga harakatga muomalaga layoqatsizligi bo‘yicha Sud va Hokimlik qarorlari asosida parvarishlash nafaqalari tayinlandi. Hozirgi vaqtda 4 nafar nogironligi bo‘lgan fuqaro "Yangi kun" qarov xizmatidan foydalanmoqda. Ruhiy holati buzilgan 18 nafar nogironligi bo‘lgan fuqaro nomidan Sudga da'vo arizalari kiritildi.

Kelajakda ham xalqimizning ijtimoiy xizmatlarga muhtoj bo‘lgan qatlamini o‘rganib chiqib, ularni qo‘llab-quvvatlashga, aholimizning ijtimoiy ahvolini yanada yaxshilashga bor kuch-g'ayratimiz bilan xizmat qilamiz.