Qoraqalpog‘iston Respublikasi Nukus shahri hokimligi

Mahallada endi “sakkizlik” xizmati
Muhtaram Prezidentimiz tashabbusi bilan xalqimiz va hududlarimizni favqulodda vaziyatlardan ishonchli himoya qilish sohasini tubdan isloh qilishga qaratilgan muhim hujjatlar qabul qilindi. Xususan, 2025-yil 20-oktyabr kuni 185-sonli Farmon, shuningdek 310 va 311-sonli qarorlar e’lon qilinib, tizim faoliyatini yangi bosqichga olib chiqish uchun aniq vazifalar belgilab berildi.
Ushbu hujjatlar asosida favqulodda vaziyatlar profilaktikasini yanada samarali tashkil etish, aholi xavfsizligini ta’minlash borasida keng ko‘lamli islohotlar amalga oshirilmoqda.
Jumladan, Nukus shahridagi 71 ta mahallada avvalgi yillarda jami 4 nafar profilaktika inspektori faoliyat yuritgan bo‘lsa, amalga oshirilgan islohotlar natijasida har 4 ta mahallaga bittadan davlat inspektori lavozimi joriy etildi. 2026-yildan boshlab ushbu inspektorlar faoliyati to‘liq yo‘lga qo‘yildi.
Bugungi kunda mahallalarda xavfsizlikni ta’minlashga qaratilgan “mahallabay” va “xonadonbay” ishlash tizimi amaliyotga joriy etilmoqda.
Bu jarayonda mahallada faoliyat yuritib kelayotgan “yettilik” tarkibiga yana bir bo‘g‘in qo‘shilib, endilikda “sakkizlik” tizimi shakllanmoqda.
Shu munosabat bilan shahrimizdagi 17 ta mahallada tashkil etilgan “Mahalla qo‘riqlash” xizmati xonalarining moddiy-texnik bazasini mustahkamlash maqsadida davlat inspektorlariga zamonaviy kompyuter texnikalari topshirildi.
Mazkur tadbirda Nukus shahri hokimi A. Daniyarov ishtirok etib, mahallalarda zamonaviy texnika vositalaridan foydalanish profilaktika ishlarining samaradorligini oshirishini ta’kidladi.
Mutasaddilarning qayd etishicha, mazkur yangiliklar mahallalarda xavfsizlikni ta’minlash, aholi bilan ishlashni yanada tizimli yo‘lga qo‘yish hamda xavf-xatarlarni barvaqt aniqlashda muhim ahamiyat kasb etadi.