YANGILIKLAR
2025-12-19 15:00:00 / Yangiliklar
Sog‘lom avlod – kelajak xavfsizligi: Nukusda jamiyat poydevorini mustahkamlashga qaratilgan muhim seminar
Jamiyatning ertangi kuni bugun qanday avlodni tarbiyalayotganimiz bilan belgilanadi. Shu ma’noda sog‘lom, bilimli va ma’naviy yetuk yoshlar — har qanday barqaror jamiyatning eng mustahkam poydevoridir. Ana shu ezgu maqsad yo‘lida 2025 yil 19 dekabr kuni Nukus shahrida “Sog‘lom avlod – mustahkam jamiyat poydevori” mavzusida muhim seminar tashkil etildi.
1-sonli Nukus Abu Ali Ibn Sino nomidagi jamoat salomatligi texnikumida o‘tkazilgan mazkur tadbir Nukus shahri hokimligi hamda Respublika Ma’naviyat va ma’rifat markazi Nukus shahar bo‘limi tashabbusi bilan amalga oshirildi. Seminarda ta’lim tizimi, mahalla, davlat idoralari va jamoatchilik vakillari bir maydonga jam bo‘lib, yoshlar tarbiyasi va sog‘lom turmush tarzi masalalarini atroflicha muhokama qildilar.
Tadbirda so‘zga chiqqan mas’ullar Prezidentimiz tomonidan yoshlarga qaratilayotgan keng ko‘lamli islohotlar maktab va mahalla tarbiya tizimini mustahkamlashda muhim tayanch bo‘layotganini ta’kidladilar. Voyaga yetmaganlar o‘rtasida huquqbuzarlik va jinoyatchilikning oldini olish, erta turmush va erta tug‘ruqning salbiy oqibatlari, qizlar salomatligini asrash masalalari bugungi kunning dolzarb vazifasi sifatida qayd etildi.
Shuningdek, seminar davomida “Sog‘lom turmush tarzi – insonning jismoniy va ma’naviy salomatligi asosi” degan tamoyil hayotiy misollar orqali yoritildi. Ta’lim muassasalarida “Davlat tili to‘g‘risida”gi qonunning ijrosi, “Jaholatga qarshi ma’rifat” g‘oyasi asosida jamiyatda odob-axloq va milliy qadriyatlarni mustahkamlash, diniy ekstremizmning oldini olish masalalari alohida urg‘u bilan ko‘rsatildi.
Bundan tashqari, Vazirlar Mahkamasining 2025 yil 16 sentyabrdagi 589-son qarori doirasida oziq-ovqat chiqindilaridan samarali foydalanish, isrofgarchilikning oldini olish va atrof-muhitni asrash masalalari ham jamoatchilik ongiga yetkazildi. Bu esa sog‘lom turmush tarzining faqat shaxsiy emas, balki ijtimoiy mas’uliyat ekanini yana bir bor tasdiqladi.
Tadbirda Nukus shahar hokimi o‘rinbosari Z.Davletnazarova, Din ishlari bo‘yicha qo‘mitaning Qoraqalpog‘iston Respublikasi hududiy boshqarmasi mutaxassislari X.Ibragimova va Q.Nezametov, hokimning davlat tili masalalari bo‘yicha maslahatchisi B.Abdireymov hamda Respublika Ma’naviyat va ma’rifat markazi Nukus shahar bo‘limi boshlig‘i Q.Nuratdinovlar ma’ruza qildilar.
Seminar ochiq muloqot ruhida o‘tib, ishtirokchilar o‘zlarini qiziqtirgan savollarga mutaxassislar tomonidan aniq va asosli javoblar oldilar. Tadbir yakunida “Sog‘lom avlod – mustahkam jamiyat poydevori” shiorini kundalik hayot tamoyiliga aylantirish zarurligi yana bir bor ta’kidlandi.
Shuningdek, yil davomida ma’naviy-ma’rifiy sohada faollik ko‘rsatgan xodimlar Respublika Ma’naviyat va ma’rifat markazi Nukus shahar bo‘limi tomonidan faxriy yorliqlar bilan taqdirlandi. Bu esa jamiyatda ma’naviy mas’uliyat va ijtimoiy faollikni rag‘batlantirish yo‘lidagi muhim qadam bo‘ldi.