Oliy Majlis Qonunchilik palatasining navbatdagi majlisida O‘zbekiston Respublikasi Bosh vazirining o‘rinbosari — iqtisodiyot va moliya vaziri Jamshid Qo‘chqorov axborot berdi

Kun tartibidagi masala yuzasidan O‘zbekiston Respublikasi Bosh vazirining o‘rinbosari — iqtisodiyot va moliya vaziri  Jamshid Qo‘chqorov axborot berdi.

Ta’kidlanganidek, hisobot davrda aholining hayot darajasini yanada oshirish, milliy iqtisodiyotni jadal rivojlantirish, yuqori o‘sish sur’atlarini ta’minlash, ta’lim sifatini oshirish, ekologik barqarorlikka erishish borasida keng ko‘lamli ishlar amalga oshirilgan.  

Davlat dasturida belgilangan bir qator normativ-huquqiy hujjatlar loyihalarining ishlab chiqilishida hukumat va parlament o‘rtasida yaqin hamkorlikda faoliyat olib borildi. Qonunchilik palatasining qo‘mitalari va hukumat tomonidan nazorat-tahlil tadbirlari doirasida ko‘tarilgan masalalarni birgalikda hal etish amaliyotidan unumli foydalanilgan.  

Hisobot davrida milliy iqtisodiyotni jadal rivojlantirish va yuqori o‘sish sur’atlarini ta’minlashning ustuvor yo‘nalishlari doirasida ko‘rilgan choralar tufayli yalpi ichki mahsulot o‘sishi o‘tgan yilning mos davriga nisbatan 5,6 foizni tashkil etgan. Xorijiy davlatlarga tovarlar va xizmatlar eksporti 7,7 milliard dollarni tashkil qilib, o‘sish 112,5 foizga yetgan.  

Adolatli ijtimoiy siyosat yuritish, inson kapitalini rivojlantirish borasida ham muayyan ishlar bajarilgan. Xususan, og‘ir ijtimoiy ahvolga tushib qolgan 78 mingga yaqin ishsiz xotin-qizlarning manzilli ro‘yxati shakllantirilib, ulardan 49 ming 611 nafari ichki mehnat bozorida talab yuqori bo‘lgan kasb-hunarga o‘qitilgan.  

Umumta’lim maktablarida sog‘lom ovqatlanish tizimini amalga oshirish doirasida Qoraqalpog‘iston Respublikasi va Xorazm viloyatida 1 ming 263 ta umumta’lim maktabining 285 ming nafar boshlang‘ich sinf o‘quvchisi uchun bepul ovqatlanish tizimi yo‘lga qo‘yilgan.  

Bundan tashqari, milliy manfaatlardan kelib chiqqan holda umumbashariy muammolarga yondashish sohasidagi ustuvor yo‘nalishlar doirasida Qoraqalpog‘iston Respublikasi, Xorazm, Buxoro va Navoiy viloyatlarida jami 195 ming gektar maydonda saksovul va boshqa cho‘l o‘simliklaridan “yashil qoplamalar” yaratilgan.  

Savol-javob va muhokamalarga boy bo‘lgan majlisda deputatlar Davlat dasturining ayrim bandlarida belgilangan vazifalarning dolzarbligidan kelib chiqib, ularning ijrosi to‘liq ta’minlanib, aniq natijalarga erishilmaguniga qadar kelgusi choraklarda ham bu kabi bandlarni ijrodan olib tashlamasligini alohida qayd etishdi.  

Davlat dasturida belgilangan chora-tadbirlarning o‘z vaqtida va sifatli bajarilishini ta’minlash yuzasidan mutasaddi vazirlik va idoralarning mas’uliyatini oshirish taklifi ham ilgari surildi.  

Davlat dasturining ijrosiga oid hisobot yuzasidan har bir siyosiy partiya fraksiyasi o‘z nuqtai nazarini, fikr-mulohazalarini bildirdi. Majlisda Vazirlar Mahkamasining Davlat dasturi ijrosi yuzasidan taqdim etgan hisoboti ma’qullanib, Hukumatning tegishli faoliyati samaradorligini oshirishga qaratilgan takliflar aks etgan tegishli qaror qabul qilindi.