Namangan viloyati Namangan shahar hokimligi

Ushbu tadbir «O‘zbekiston – 2030» strategiyasi doirasida, ilm-fan va ishlab chiqarishni yanada yaqinlashtirish, ilmiy va innovasion infratuzilmalarni rivojlantirish maqsadida tashkil etildi.

Namangan muhandislik-texnologiyalar instituti tashabbusi bilan o‘tkazilgan mazkur anjumanda O‘zbekiston va qo‘shni Respublikalarning yetakchi oliy ta’lim muassasalari rektorlari, akademiklar, professorlar hamda 200 nafardan ziyod ilmiy tadqiqotchi va to‘rt mingdan ortiq yoshlar ishtirok etdi.

Namangan shahridagi “Ma’rifat maskani”da bo‘lib o‘tayotgan tadbirda Namangan shahar hokimi Anvarjon Otaxodjayev qatnashdi. U o‘z so‘zida ta’lim va ilm-fan sohalariga davlat tomonidan ko‘rsatilayotgan e’tibor bugungi kunda amaliy natijalar berayotganini alohida ta’kidladi. Shu bilan birga, tadqiqotchi ustozlar va yoshlarga o‘zining ezgu tilaklarini bildirdi.

Kongress davomida akademiklar va professorlar ilmiy ma’ruzalar bilan qatnashdilar. Ular o‘z sohalaridagi ilmiy yutuqlar, muammo va istiqbolli yo‘nalishlar haqida so‘z yuritdilar. Tadbir yakunida akademik Shavkat Ayupov ma’ruzalarni yuqori baholadi hamda bu kabi anjumanlarni kelgusida ham davom ettirish zarurligini ta’kidladi.

Mazkur kongress – ilm-fan taraqqiyotida yoshlarning o‘rni nihoyatda muhim ekanini yana bir bor namoyon etdi. Ushbu anjuman yosh avlodning ilmga bo‘lgan qiziqishini oshirish, tajribali olimlar bilan muloqot qilish imkonini yaratib, ularning kelgusidagi ilmiy faoliyatiga mustahkam zamin yaratdi.

Kongress ishida faol ishtirok etgan bir qator akademik, olim va yoshlarga shahar hokimi Anvarjon Otaxodjayev tomonidan kongress ramziy esdalik sovg‘alari topshirildi.

Namangan shahar hokimligi axborot xizmati.