Namanganda Xalqaro gullar festivali doirasida tibbiyot forum o‘tkaziladi
2025-04-11 14:15:00 / Yangiliklar
Namangan shahar hokimligida shahar hokimi Anvarjon Otaxodjayev hamda viloyat hokimining o‘rinbosari Botirjon Nuriddinovlar Turkiyaning O‘zbekistondagi elchixonasi turizm va madaniyat koordinatori Saidjon Ochilov boshchiligida tibbiyot sohasi vakillarini qabul qilishdi. Uchrashuvda Namanganda tibbiyot turizmini rivojlantirish, xususan bolalar nevroxirurgiyasi yo‘nalishida amalga oshirilayotgan operatsiyalarni xalqaro miqyosda amalga oshirish masalalari muhokama qilindi.
Saidjon Ochilov o‘z so‘zida Namanganda tibbiyot turizmini yangi bosqichga olib chiqish, shuningdek, bolalar nevroxirurgiyasi bo‘yicha xalqaro konferensiya tashkil etish taklifini bildirdi. Ushbu forum doirasida Germaniyaning "Gannover" universiteti professori, dunyoning eng yetakchi nevroxirrurglaridan biri Zafar Chinnibulak ishtirokida bolalar va kattalar nevroxirurgiyasi bo‘yicha o‘quv dasturlari va jarroxlik amaliyotlari o‘tkazilishi rejalashtirilmoqda.
Muloqot davomida Botirjon Nuriddinov davlatimiz rahbari tomonlaridan tibbiyot turizmini rivojlantirishga qaratilayotgan e’tibor va yaratilgan imkoniyatlar haqida batafsil ma’lumot berdi.
Shuningdek, tibbiyot sohasida xalqaro obro‘-e’tibor qozongan turkiyalik mutaxassis Esra Sunar ham Namanganda amalga oshirilayotgan Parkinson kasalligi, bolalar syerebral falaji (DSP) va genetik xastaliklarni davolashda qo‘llanayotgan yangi metodlar orqali Namangan tibbiyotini jahonga tanitish imkoniyati yaratilayotganini ta’kidladi. Shu bilan birga, u Ibn Sino merosidan ilhomlanib, tibbiyot turizm madaniyatini yanada rivojlantirishga hissa qo‘shishini bildirdi.
Mazkur forum nafaqat tibbiyot sohasidagi ilmiy-amaliy hamkorlikni mustahkamlash, balki Namanganni xalqaro tibbiyot turizmining yangi markazlaridan biriga aylantirishga xizmat qiladi.