Har bir shaharning ekologik holati aholining salomatligi va turmush sifatiga bevosita ta’sir ko‘rsatadi.
2025-04-09 14:25:00 / Yangiliklar
Bugun, shahar hokimi Anvarjon Otaxodjayev, viloyat ekologiya va atrof-muhitni muhofaza qilish boshqarmasi boshlig‘i Shuxrat Maksumov hamda mutasaddi tashkilotlar vakillari ishtirokida o‘tkazilgan yig‘ilishda shaharning sanitariya holati va chiqindilar bilan bog‘liq mavjud muammolar atroflicha muhokama qilindi.
Yig‘ilishda, ayniqsa, shahar ko‘chalarida va aholi zich yashaydigan hududlarda paydo bo‘layotgan noqonuniy chiqindixonalar ekologik muvozanatga tahdid solayotgani ta’kidlandi.
Mazkur muammolarni bartaraf etish maqsadida Qodir Otamirzayev ko‘chasidagi ko‘prik ostida joylashgan noqonuniy chiqindixona olib tashlanib, o‘rniga zamonaviy talablarga javob beradigan, avtomobil yo‘lidan chekkada joylashgan maxsus chiqindi tashlash maydonchasi tashkil etilishi rejalashtirildi. Bunday maydonlar shaharning boshqa hududlarida ham bosqichma-bosqich joriy etiladi.
Bu tashabbuslar orqali chiqindilarni nazoratli ravishda jamlash va olib chiqib ketish, ularni qayta ishlash imkoniyatlarini kengaytirish hamda aholining ekologik ongini yuksaltirish ko‘zda tutilgan.
Namangan shahar hokimligi axborot xizmati.