Namangan viloyati Namangan shahar hokimligi

Shahrimizning eng gavjum nuqtalaridan biri — Lutfiy, Usmon Nosir va Bank ko‘chalari kesishgan hududning qariyb 2 kilometrlik qismida bunyod etilayotgan zamonaviy xizmat ko‘rsatish ko‘chasi yakuniy bosqichga yetib, faoliyat boshlash arafasiga keldi. Ushbu loyiha shahar infratuzilmasini yangi bosqichga olib chiqish bilan birga, aholiga qulay va uzluksiz xizmat ko‘rsatish tizimini yaratishga xizmat qiladi.

Mazkur hudud “Zamin dizayn” MChJ tomonidan ishlab chiqilgan zamonaviy loyiha asosida shakllantirilib, “Big family” MChJ pudratchilari tomonidan keng ko‘lamli qurilish ishlari olib borildi. Ayni paytda ishlar yakunlanish arafasida bo‘lib, obyektlar tashqi va ichki bezak ishlari bilan to‘liq ta’minlanmoqda.

“Zarbdor tajribasi” asosida tashkil etilayotgan ushbu servis hududida 24/7 rejimida faoliyat yurituvchi 20 dan ortiq savdo va xizmat ko‘rsatish obyektlari joylashadi. E’tiborlisi, mazkur obyektlar “K-savdo” elektron platformasi orqali xarid qilgan tadbirkorlar tomonidan bunyod etilib, bu esa ochiqlik va zamonaviy boshqaruv yondashuvining amaliy ifodasiga aylandi.

Namangan shahar hokimi Ayubxon Kamalov hududda olib borilayotgan ishlar bilan bevosita tanishib, qurilish sifati va muddatlariga alohida e’tibor qaratdi. O‘rganish jarayonida aniqlangan ayrim kamchiliklarni bartaraf etish, ishlarni belgilangan standartlar asosida yakunlash yuzasidan mas’ullarga aniq topshiriq va ko‘rsatmalar berildi.

Mazkur loyiha nafaqat shahar ko‘rinishini yanada jozibador qiladi, balki yangi ish o‘rinlari yaratish, xizmatlar sifatini oshirish hamda tadbirkorlik muhitini yanada rivojlantirishga mustahkam zamin yaratadi.