65-Xalqaro gullar festivali doirasida “Oʻzbekiston (Namangan) — Afgʻoniston savdo-iqtisodiy hamkorlik forumi" boʻlib oʻtdi.
2026-05-23 21:10:00 / Yangiliklar
Unda Namangan viloyatidagi yirik ishlab chiqaruvchilar hamda Afgʻoniston Investitsiya va savdo-sanoat palatasi raisi oʻrinbosari Arian Zalgʻay Azimi boshchiligidagi afgʻonistonlik tadbirkorlar ishtirok etdilar.
Tadbir dastlab “Xalqaro gullar festivali”ning 65 yillik yubileyiga bagʻishlangan videorolik namoyishi bilan boshlandi.
Forumni ochib bergan Namangan viloyati hokimi Shavkatjon Abdurazzoqov oʻz nutqida bugungi uchrashuv nafaqat iqtisodiy aloqalarni mustahkamlash, balki xalqlar oʻrtasidagi ishonch, doʻstlik va oʻzaro manfaatli hamkorlikni yangi bosqichga olib chiqishga xizmat qiladigan muhim muloqot maydoni ekanini taʼkidladi.
Shuningdek, Afgʻonistonga amalga oshirilgan tashrif doirasida erishilgan kelishuvlar va savdo-iqtisodiy aloqalar bugun oʻzining amaliy natijalarini berayotgani, mazkur forum ham ikki davlat tadbirkorlari oʻrtasida yangi hamkorlik va istiqbolli shartnomalar uchun muhim zamin boʻlishi qayd etildi.
Shundan soʻng soʻzga chiqqan Afgʻoniston Investitsiya va savdo-sanoat palatasi raisi oʻrinbosari Arian Zalgʻay Azimi Namangan tadbirkorlarining ishbilarmonligi, sanoat va ishlab chiqarish sohasidagi salohiyatini yuqori baholadi. U joriy yil mart oyida Shavkatjon Abdurazzoqov boshchiligidagi delegatsiyaning Afgʻonistonga tashrifi davomida 500 million dollarlik shartnomalar imzolanganini eslab, bugungi forum ham yangi manfaatli kelishuvlarga yoʻl ochishini taʼkidladi.
Tadbir davomida namanganlik tadbirkorlar tomonidan tayyorlangan mahsulotlar koʻrgazmasi namoyish etildi. Shuningdek, ikki mamlakat ishbilarmon doiralari oʻrtasida B2B muzokaralar oʻtkazilib, qator muhim shartnomalar imzolandi.