O‘zbekiston Respublikasi Mudofaa vazirligi

Yugurish musobaqasi poytaxtimizning “Birodarlik qabristoni” yodgorlik majmuasi va “Bunyodkor” stadioni hududlari oralig‘ida o‘tkaziladi. Unda 2000 nafar ishtirokchini qamrab olish rajalashtirilgan.  

Mazkur sanaga bag‘ishlangan yugurish musobaqasi haqida keng jamoatchilik va ommaviy axborot vositalari xodimlariga ma’lumot berish maqsadida O‘zbekiston Respublikasi Prezidenti Administratsiyasi huzuridagi Axborot va ommaviy kommunikatsiyalar agentligining anjumanlar zalida Mudofaa vazirligining navbatdagi matbuot anjumani tashkil etildi.

Unda mudofaa vazirining o‘rinbosari general-mayor Xamdam Karshiyev, Mudofaa vazirligi boshqarma boshlig‘i polkovnik Ulug‘bek Mamadaliyev, O‘zbekiston Respublikasi Yoshlar ishlari agentligi direktorining birinchi o‘rinbosari Dilnozaxon Kattaxanova hamda Respublika Ma’naviyat va ma’rifat markazi rahbarining birinchi o‘rinbosari Botu Alimov spiker sifatida ishtirok etib, respublika axborot agentliklari va ommaviy axborot vositalari vakillariga bayram yugurishini tashkillashtirish masalalari va asosiy g‘oyasi haqida ma’lumot berishdi.

Matbuot anjumanida qayd etilganidek, Ikkinchi jahon urushi insoniyat tarixidagi eng qonli urush bo‘lgan. Unda 70 milliondan ortiq inson halok bo‘lgan, shundan 27 millioni jang maydonlarida jon bergan. O‘zbekiston ushbu g‘alabaga salmoqli hissa qo‘shgan – 6,5 million aholiga ega respublikamizdan 1 million 951 mingdan ortiq inson frontga jo‘natilgan, ulardan 538 ming nafari halok bo‘lgan.

Urush davrida O‘zbekiston muhim front orti markaziga aylangan. Bu yerda 280 ta yangi korxona barpo etilgan, harbiy mahsulotlar ishlab chiqarish yo‘lga qo‘yilgan, respublikamiz esa 1,5 milliondan ortiq evakuatsiya qilinganlarni, jumladan, 250 ming yetim bolani bag‘riga olgan.

Yugurish musobaqasi urush qahramonlariga, ularning jasorati, mardligi va fidoyiligiga hurmat ramzi sifatida tashkil etilib, ishtirokchilarning har bir qadami o‘z hayoti evaziga avlodlar kelajagini himoya qilganlarga bag‘ishlanadi.

Bu musobaqa – shunchaki sport tadbiri emas. Har bir ishtirokchi go‘yo frontdan maktub olib kelayotgan “Xotira elchisi”ga aylanadi. Bu yugurish – o‘z hayoti evaziga kelajakni himoya qilganlarning jasoratini ulug‘lash, bugungi tinchlikning qadriga yetish, yangi avlodga tarixni eslatish yo‘lidir.

Matbuot anjumanida ochiqlanganidek, maxsus tarzda qayta ko‘rib chiqilgan harbiy qayd varaqalari asosida aniqlanishicha, O‘zbekiston zaminidan frontga 1 million 951 ming nafar yurtdoshimiz safarbar etilgan. Bugungi kunda O‘zbekistonda Ikkinchi jahon urushi qatnashchilari va ularga tenglashtirilgan faxriy 82 nafarni tashkil qiladi. Ularning eng ulug‘i 114 yoshni qarshilagan.

Shuningdek, matbuot anjumanida spikerlar tomonidan ommaviy axborot vositalari vakillarining savollariga to‘laqonli javoblar berildi. Xususan, tadbir dasturi, unda ishtirok etish talablari va shartlari, sharoitlar, maxsus kiyim, yugurish yo‘li bo‘ylab o‘rnatiladigan badiiy ko‘rgazmalar, tantanali musiqiy dasturlar, shu bilan birga, birodarlik qabrlari yonida Xotira devorining o‘rnatilishi kabi jarayonlar haqida batafsil ma’lumotlar berildi.

Ma’lumot uchun, musobaqadan tashqari Mudofaa vazirligi Toshkent shahri hokimligi bilan birgalikda “Yangi O‘zbekiston” bog‘ida 9-may kuni soat 21:00 da Xotira va qadrlash kuniga bag‘ishlangan bayram salyuti va mushakbozligini tashkil qiladi.

Mudofaa vazirligi axborot va ommaviy kommunikatsiyalar departamenti