O‘zbekiston Respublikasi Mudofaa vazirligi

Viloyat hokimligi, Shimoli-g‘arbiy harbiy okrug qo‘shinlari qo‘mondonligi, viloyat mudofaa ishlari va sport boshqarmalari, Yoshlar ittifoqi viloyat bo‘limi hamda Oliy ta’lim, fan va innovatsiyalar vazirligining viloyat hududiy boshqarmasi bilan hamkorlikda o‘tkazilgan musobaqa yoshlarning bo‘sh vaqtini mazmunli tashkil qilish, ularning iqtidorini namoyon etishiga ko‘maklashish, shuningdek, sog‘lom turmush tarzini targ‘ibotiga xizmat qildi.

Bellashuvda viloyatdagi 7 ta oliy o‘quv yurtidan 18 yoshdan 30 yoshgacha bo‘lgan talabalar ishtirok etib, g‘alaba uchun kuchli kurash olib bordi. Har bir jamoaning 10 nafar a’zosidan 8 nafari o‘g‘il bola hamda 2 nafari qiz bolalardan iborat bo‘lib, 6 ta shart bo‘yicha o‘zaro kuch sinashdi.

Dastlab talabalar jamoaviy tarzda safda shahdam qadam yurib, saf qo‘shiqlarini ijro etishdi. Ikkinchi shartda ishtirokchi jamoalardan bir nafardan o‘g‘il va qiz bolalar qatnashib, pnevmatik miltiqdan nishonga o‘q uzishdi. Uchinchi shart bo‘yicha jamoalarning ikki nafar o‘g‘il bola a’zosi granatani uzoqqa uloqtirishda bellashdi. “Harbiylashtirilgan estafeta” shartida har jamoadan uch nafardan o‘g‘il bolalar avtomatni noto‘liq qismlarga ajratish va yig‘ish, gazga qarshi niqobni kiyib yugurishi belgilangan. Keyingi shartlarda jamoalar 100 metr masofaga yugurish hamda turnikda tortilishda o‘zaro bahslashdi.

Qizg‘in va murosasiz kechgan harbiy-sport musobaqasi shartlariga ko‘ra, faxrli birinchi o‘rin Urganch davlat pedagogika instituti jamoasiga nasib etdi. Faxrli ikkinchi o‘ringa Urganch davlat universiteti hamda uchinchi o‘ringa Urganch innovatsion universiteti jamoalari munosib topildi.

G‘olib va sovrindorlar tashkilotchilar tomonidan diplom va esdalik sovg‘alari bilan taqdirlandi.

Shimoli-g‘arbiy harbiy okrug matbuot xizmati