Navro‘z — boqiy qadriyatlar kuychisi!
2025-03-20 17:40:00 / Yangiliklar
Ommaviy sayl tarzida o‘tkazilgan bayram tantanasida harbiy xizmatchilar va ularning oila a’zolari vaqtlarini chog‘ o‘tkazishdi. Milliy libos kiygan kelinlarning salomlari, keng maydonda zavqlanib varrak uchirayotgan bolakaylar, el suygan san’atkorlarning diltortar taronalari yig‘ilganlarga xushkayfiyat ulashdi.
Tadbir davomida qadimiy Navroʻz anʼanalariga sodiq holda, doshqozonlarda sumalak va turli milliy taomlar pishirildi. Xalqimizning Navro‘z bayramlari kurash musobaqalarisiz o‘tmaydi. Bayram maydonlarida harbiylar milliy oʻyinlar va sport musobaqalarida bellashib, turli xil sovrinlarni qo‘lga kiritishdi.
Shuningdek, harbiy qism va muassasalarning milliy ko‘rgazmalari tashkil etilib, tadbir ishtirokchilariga o‘zbek xalqining boy tarixi, urf-odatlari va harbiy merosi aks ettirilgan eksponatlar namoyish qilindi.
Tadbir doirasida okrug qo‘mondonligi tomonidan bolajonlarning Xatna to‘ylari ham oʻtkazilib, ularning oilalariga bayram sovg‘alari topshirildi.
Ta’kidlash joizki, harbiy xizmatchilar va ularning yaqinlari uchun bu kun nafaqat Navroʻz shukuhi, balki doʻstlik va ahillik, Vatan himoyachilari o‘rtasidagi birdamlik ruhini yanada mustahkamlash ayyomi boʻldi.
Sharqiy harbiy okrug matbuot xizmati