Hurmatli Mirzo Ulug‘bek tumani aholisi, mahalla raislari va “yettlik” a’zolari!
2026-01-25 11:10:00 / Rahbariyatning bayonotlari va nutqlari
Bugungi kunda yurtimizda aholini ro‘yxatga olish jarayoni izchil va yuqori sur’atlarda olib borilmoqda. Mazkur muhim jarayonda faol ishtirok etayotgan barcha fuqarolarimiz, ayniqsa mahalla raislari hamda “yettlik” a’zolarining mas’uliyatli va fidokorona mehnati alohida e’tirofga loyiqdir.
Xususan, mahalla tizimida faoliyat yuritayotgan fidoyi insonlar kecha-kunduz demay, sovuq va murakkab ob-havo sharoitlariga qaramasdan, xonadonma-xonadon yurib, aholining to‘liq ro‘yxatga olinishi yo‘lida sidqidildan xizmat qilmoqdalar. Bu — yuksak mas’uliyat, sadoqat va vatanparvarlikning yorqin namunasidir.
Har bir kirilgan xonadon, har bir amalga oshirilgan ro‘yxat kelajak taraqqiyoti, adolatli rejalashtirish va xalq farovonligi uchun mustahkam poydevor bo‘lib xizmat qiladi. Bugungi mashaqqatli mehnat ertangi islohotlar va barqaror rivojlanishning muhim omilidir.
Shu munosabat bilan, aholini ro‘yxatga olish jarayonidagi faollikni yanada oshirishga, barcha tumandoshlarimizni ushbu muhim tadbirda faol ishtirok etishga chorlayman.
Xalqimiz birdamligi va mas’uliyati bilan har qanday marralarni zabt etishimizga ishonaman.
Hurmat bilan,
Mirzo Ulug‘bek tuman hokimi
Boxodir Gaibnazarov