Qashqadaryo viloyati Mirishkor tumani hokimligi

Mirishkorda boshoqli don ekinlari parvarishiga bag‘ishlangan ko‘rgazmali seminar o‘tkazildi

Mirishkor tumani “Jeynov” hududida qishloq xo‘jaligini ilmiy asosda rivojlantirish, hosildorlikni oshirish hamda zamonaviy agrotexnologiyalarni amaliyotga keng joriy etishga qaratilgan ko‘rgazmali seminar bo‘lib o‘tdi. Unda Mirishkor tumani hokimi Fayzullo G‘ulomov, Qashqadaryo viloyati prokurorining o‘rinbosari O‘ktam Yusupov, viloyat Qishloq xo‘jaligi boshqarmasi boshlig‘i Obloyor Boymirov, Agroinspeksiyaning Qashqadaryo viloyati boshqarmasi boshlig'i Sultonmurod Donayev, shuningdek, fermer xo‘jaliklari rahbarlari va soha mutaxassislari ishtirok etdi.

Ko‘rgazmali seminar 2026-yil hosili uchun parvarishlanayotgan boshoqli don ekin maydonlarida tashkil etilib, unda joriy mavsumda joriy etilayotgan ilg‘or agrotexnik tadbirlar muhokama qilindi. Xususan, “Shinjon” tajribasi asosida 76x10 santimetrli qo‘shqator sxema asosida ekin ekish, suv resurslaridan oqilona va tejamkor foydalanish, mahalliy o‘g‘itlarni tayyorlash va qo‘llash, sharbat usulida sug‘orish tizimini joriy etish, dala chetlaridan samarali foydalanish, g‘alla maydonlarini mineral o‘g‘itlar bilan oziqlantirish hamda zararkunandalarga qarshi kurashish masalalari yuzasidan atroflicha fikr almashildi.

Shuningdek, fermerlarga amaliy tavsiyalar berilib, har bir agrotexnik jarayonning hosildorlikka ta’siri misollar orqali tushuntirib o‘tildi. Seminar yakunida fermer xo‘jaliklari hududlarida sug‘orish tizimini yaxshilash maqsadida ariqlarni betonlash ishlari boshlab yuborildi.

Tadbir doirasida rahbarlar tomonidan dala chetlariga mevali daraxtlar ekilib, qishloq xo‘jaligida samarali yer foydalanish, ekologik muhitni yaxshilash hamda kelgusida qo‘shimcha daromad manbalarini yaratish borasidagi ezgu tashabbuslar amalda namoyon etildi.