Konstitutsiyasi qabul qilinganining 33 yilligi munosabati bilan hokim tabrigi
2025-12-08 09:00:00 / Rahbariyatning bayonotlari va nutqlari
Assalomu alaykum, aziz yurtdoshlar!
Bugun xalqimiz hayotida yuksak ma’naviy ahamiyatga ega bo‘lgan, mustaqil, suveren va demokratik O‘zbekiston davlatining mustahkam poydevorini barpo etgan ulug‘ hujjat – O‘zbekiston Respublikasi Konstitutsiyasi qabul qilinganining 33 yilligi mamlakatimiz bo‘ylab keng nishonlanmoqda.
Shu qutlug‘ ayyom bilan Siz, aziz hamyurtlarimni chin dildan muborakbod etaman!
Asosiy Qonunimiz jamiyat hayotining barcha sohalarida izchil amalga oshirilayotgan keng qamrovli islohotlarning yuridik asosini, inson huquq va erkinliklarining ishonchli kafolatini yaratib kelmoqda. Bugun Konstitutsiyamizda belgilangan tamoyillar asosida milliy qonunchilik tizimi, davlat hokimiyati va boshqaruv organlari, fuqarolik jamiyati institutlari rivojlanib, barcha sohalarda keng ko‘lamli o‘zgarishlar amalga oshirilayotgani – xalqimizning dunyoqarashi, salohiyati va ongining yuksalayotgani bilan hamohangdir.
Ma’lumki, har bir demokratik jamiyat taraqqiyotining asosiy mezoni – uning Konstitutsiyasidir. Chunki Konstitutsiya davlatning kelajak yo‘lini, taraqqiyotining strategik maqsadlarini belgilab beradigan bosh qonun sanaladi.
So‘nggi yillarda mamlakatimizda Prezidentimiz Shavkat Mirziyoyev sa’y–harakatlarining amaliy ifodasi sifatida “Xalq davlat idoralariga emas, davlat idoralari xalqimizga xizmat qilishi kerak” degan tamoyil islohotlarning bosh g‘oyasiga aylandi. Bu tamoyilni amaliyotga tatbiq etish jarayonida “inson – jamiyat – davlat” kontseptsiyasining konstitutsiyaviy norma sifatida mustahkamlanishi bejiz emas.
Shu bois, Asosiy Qonunimizni bugungi hayot sur’atlari va Yangi O‘zbekiston taraqqiyot strategiyasiga mos holda takomillashtirish vazifasi davlatimiz oldida turgan eng muhim masalalardan biridir.
Xalqimizning taklif va istaklari asosida Konstitutsiyaviy komissiya tomonidan qator o‘zgartish va qo‘shimchalar ishlab chiqilib, xalqchil, adolatparvar konstitutsiyaviy islohotlar amalga oshirilgani ham bu yo‘ldagi muhim qadam bo‘ldi.
Qadrli yurtdoshlar!
Mamlakatimizda olib borilayotgan barcha islohotlarning markazida inson manfaatlari, uning qadr–qimmati va huquqlarini yuksaltirish g‘oyasi mujassam. Zero, inson farovon hayot kechirsa, ilm-fan, mehnat va bunyodkorlik yo‘lida erkin intilib yashasa – jamiyat va davlat barqaror rivojlanadi.
Yurtboshimiz ta’biri bilan aytganda:
“Inson qadrini yuksaltirish – davlat hokimiyati organlarining konstitutsiyaviy burchi va eng ustuvor vazifasidir.”
Aziz hamshaharlar!
Bugungi tinch va farovon hayotimiz, qo‘lga kiritayotgan yutuqlarimiz – barchamizning mehnati, mas’uliyati va yurt taqdiriga befarq bo‘lmagan faol fuqarolik pozitsiyamizga chambarchas bog‘liq. Yaxshi yashash, yuksak marralarga erishish avvalo o‘z qo‘limizda.
Ajdodlarimizning boy merosi, xalqimizning bunyodkorlik ruhi, ilmga chanqoqligi va tadbirkorlik salohiyati bizga har qanday marrani zabt etish uchun kuch-qudrat bag‘ishlaydi.
Sizlarni yana bir bor O‘zbekiston Respublikasi Konstitutsiyasi qabul qilinganining 33 yilligi bilan chin dildan tabriklayman.
Vatanimiz tinch, xalqimiz omon bo‘lsin!
Mirishkor tumani hokimi
G‘ulomov Fayzulla Qurbonovich