Mingbuloq tumanidagi Gulbog‘ jome' masjidining yangi binosi Qurbon hayiti arafasida foydalanishga topshirildi. Mazkur xayrli tadbir yurtdoshlar uchun bayramona kayfiyat va katta quvonch ulashdi.
2026-05-26 09:25:00 / Yangiliklar
Tantanali ochilish marosimida tuman hokimligi vakillari, nuroniylar, imom-xatiblar hamda mahalla faollari ishtirok etdi. So‘zga chiqqanlar mamlakatimizda diniy sohada olib borilayotgan islohotlar, muqaddas qadamjolar va ibodat maskanlarini obod etish ishlari izchil davom etayotganini alohida ta’kidladilar.
Yangi masjid binosi zamonaviy talablar asosida barpo etilgan bo‘lib, keng va shinam namozxona, tahoratxona hamda qulay sharoitlar yaratilgan. Bu yerda nafaqat ibodat qilish, balki yoshlarga ma’naviy tarbiya berish, milliy va diniy qadriyatlarni targ‘ib etishga ham alohida e’tibor qaratiladi.
Tadbir davomida Qur’on tilovat qilinib, yurtimiz tinchligi, xalqimiz farovonligi va el-yurt osoyishtaligi uchun duolar qilindi.
Qurbon hayiti arafasida xalq xizmatiga topshirilgan ushbu yangi masjid mahalla ahlining yanada birdam bo‘lishiga, ezgulik va bag‘rikenglik muhitini mustahkamlashga xizmat qilishi ta’kidlandi.