Saudiya Arabistonidan munosabat: Germaniya O'zbekistonning mintaqadagi, ayniqsa "yashil" energiyaga o'tish va texnologik modernizatsiya sharoitida muhim hamkor hisoblanadi
2024-09-23 09:15:00 / Yangiliklar
AR-RIYOZ, 22-sentabr. /"Dunyo" AA/. "Tanmiah Press" elektron sahifasi bosh muharriri Abdulhamid Hamid Abdulloh al-Kubbi "Dunyo" AA uchun intervyusida O'zbekiston Prezidenti Shavkat Mirziyoyevning 17-sentabr kuni Ostona shahrida bo'lib o'tgan "Markaziy Osiyo – Germaniya" sammitidagi ishtiroki haqidagi fikrlarini bildirdi:
– Ostona shahrida bo'lib o'tgan "Markaziy Osiyo + Germaniya" sammitida O'zbekiston ulkan iqtisodiy va resurs imkoniyatlariga ega davlat sifatida muhim rol o'ynadi.
O'zbekiston Prezidenti Shavkat Mirziyoyev sammitidagi nutqida Germaniya bilan iqtisodiy hamkorlikni yanada chuqurlashtirish zarurligini ta'kidladi. U O'zbekiston allaqachon nemis kompaniyalari bilan faol ish olib borayotganini qayd etib, yuqori texnologiyalar, "yashil" energiya va innovatsiyalar kabi sohalarda hamkorlikni oshirishga tayyorligini bildirdi.
Mamlakatingiz yetakchisi O'zbekiston iqtisodiyotiga Germaniya sarmoyasi uchun qulay shart-sharoitlar yaratish, transport-logistika infratuzilmasini rivojlantirish, Yevropa bozorlariga yetkazib berishni diversifikatsiya qilish uchun mamlakatning boy tabiiy resurslaridan foydalanish kabi bir qancha muhim ustuvor yo'nalishlarga alohida to'xtalib o'tdi. Shuningdek, muqobil energiya manbalarini yaratish, jumladan, "yashil" vodorod ishlab chiqarish va kam uglerodli iqtisodiyotni yaratish bo'yicha loyihalarning ahamiyatiga e'tibor qaratildi. Bu global iqlim kun tartibi va Yevropaning barqaror energiya resurslariga o'tishi sharoitida ayniqsa dolzarbdir.
Davlatingiz rahbari O'zbekiston iqtisodiyotini modernizatsiya qilishda Germaniyaning "Siemens" va "BASF" kabi kompaniyalari muhim o'rin tutayotganini ham ta'kidladi. Shuningdek, Germaniya bilan hamkorlikni kuchaytirish Markaziy Osiyo va Yevropa o'rtasidagi iqtisodiy aloqalarni mustahkamlash, mintaqa taraqqiyoti uchun yangi imkoniyatlar yaratishiga ishonch bildirildi.
Germaniya, o'z navbatida, O'zbekistonning mintaqadagi, ayniqsa "yashil" energiyaga o'tish va texnologik modernizatsiya sharoitida muhim hamkor hisoblanadi.
Uzoq muddatli istiqbolda Germaniya va O'zbekiston o'rtasidagi munosabatlar barqaror o'sish yo'nalishida rivojlanmoqda. Bunga erishish uchun har ikki tomon ham ekologik va iqtisodiy barqarorlikka yo'naltirilgan qo'shma loyihalarga faol sarmoya kiritishda davom etishi muhim. O'zbekiston yangi texnologiyalarga o'tishni jadallashtirish va "yashil" iqtisodiyot standartlarini joriy etish orqali Germaniya bilan hamkorlikdan sezilarli foyda ko'rishi mumkin.