O‘zbekiston Respublikasi Investitsiyalar, sanoat va savdo vazirligi

 4–6-iyun kunlari ISSV vaziri oʻrinbosari Ibrohim Ergashev boshchiligidagi ishchi guruh Oʻzbekiston Respublikasi Prezidenti Sh.M. Mirziyoyev raisligida joriy yilning 2-iyun kuni oʻtkazilgan yigʻilishda belgilangan topshiriqlar ijrosini taʼminlash maqsadida Navoiy hamda Buxoro viloyatlaridagi kimyo sanoati korxonalari faoliyatini joyiga chiqqan holda oʻrgandi.

Tashrif davomida hududlardagi tarmoq korxonalarining eksport salohiyatini kengaytirish imkoniyatlarini joyida tahlil qilindi. Xususan, “Navoiyazot” AJ, “Sogda Kimyo Zavod” MCHJ, “Zarafshon Industrial Technology” XK MCHJ, “Unigroup Navoiy” XK MCHJ hamda “Aerosol East” XK MCHJ korxonalaridagi ishlab chiqarish jarayonlari va yuzaga kelayotgan dolzarb muammolar atroflicha koʻrib chiqildi.

Bundan tashqari, 6-iyun kuni Buxoro viloyatida eksportchi korxonalar vakillari bilan ochiq muloqot shaklida uchrashuv oʻtkazildi. Unda tadbirkorlar oʻzlarini qiynayotgan masalalarni koʻtarib, davlat tomonidan koʻrsatilishi lozim boʻlgan qoʻllab-quvvatlash choralari yuzasidan vazirlik rahbariyati bilan muhokama qildilar.

Uchrashuvda koʻrib chiqilgan barcha masalalar boʻyicha yechimlar joyida belgilab olindi. Masʼul rahbarlarga tegishli vazirlik, idoralar hamda mahalliy hokimiyat organlari bilan hamkorlikda mavjud muammolarni tezkorlik bilan bartaraf etish, shuningdek, kelgusida bunday masalalarning oldini olishga qaratilgan tizimli takliflarni ishlab chiqish yuzasidan topshiriqlar berildi.