"Payshanba – yoshlar kuni" doirasida yoshlar uchun amaliy uchrashuv tashkil etildi
2026-07-23 11:30:00 / Yangiliklar
Marhamat tumanida "Payshanba – yoshlar kuni" doirasida yoshlarning bilim va ko‘nikmalarini oshirish, ularni zamonaviy qishloq xo‘jaligi sohasiga keng jalb etish hamda innovatsion agrotexnologiyalarni targ‘ib qilishga qaratilgan tadbirlar izchil davom etmoqda.
Navbatdagi uchrashuvda Marhamat tumani hokimi Ilyosbek Umrzaqov hamda qishloq xo‘jaligi sohasida ko‘p yillik tajribaga ega, tutchilik yo‘nalishida respublika miqyosida yangi nav yaratib, o‘zining samarali faoliyati bilan namuna ko‘rsatgan mutaxassis A.Musurmonkulov ishtirok etdi.
Dastlab yoshlar tuman hokimi boshchiligida Andijon tajriba-ko‘rgazma maydoniga tashrif buyurib, qishloq xo‘jaligi mahsulotlarini saqlash, saralash va qayta ishlash uchun joriy etilgan zamonaviy texnologiyalar hamda yuqori unumdor uskunalar faoliyati bilan yaqindan tanishdilar. Mutaxassislar tomonidan ushbu texnologiyalarning afzalliklari, mahsulot sifatini saqlash, hosildorlikni oshirish va qo‘shimcha qiymat yaratishdagi o‘rni haqida batafsil ma'lumotlar berildi.
Shuningdek, uchrashuv davomida zamonaviy qishloq xo‘jaligi texnologiyalarini joriy etish, tomchilatib sug‘orish tizimlarining samaradorligi, suv resurslaridan oqilona foydalanish, yosh fermerlarga yer ajratish va yerdan foydalanish huquqi, qishloq xo‘jaligi sohasida imtiyozli kreditlar hamda davlat subsidiyalaridan foydalanish tartibi yuzasidan atroflicha tushuntirishlar berildi.