Shahar hokimi boshchiligida "Baxrin" mahallasida kompleks o‘rganish ishlari amalga oshirildi
2026-07-22 16:45:00 / Yangiliklar
Bugun erta tongdan Marg‘ilon shahri hokimi Elbek Rustamov boshchiligidagi ishchi guruh a’zolari tomonidan shaharning "Baxrin" mahallasi hududida kompleks o‘rganish ishlari olib borildi.
O‘rganishlardan ko‘zlangan asosiy maqsad mahalla infratuzilmasini yanada yaxshilash, aholi uchun munosib va qulay yashash sharoitlarini yaratish, kommunal xizmatlar sifati hamda ijtimoiy-iqtisodiy holatni chuqur tahlil qilishdan iborat bo‘ldi.
Ishchi guruh tomonidan mahalladagi gaz, elektr energiyasi va ichimlik suvi ta’minotida mavjud muammo va kamchiliklar o‘rganilib, ularni bartaraf etish bo‘yicha tegishli tashkilotlar rahbarlariga aniq vazifalar yuklatildi. Shuningdek, ichki yo‘llar, obodonlashtirish ishlari, sanitariya holati, ko‘cha yoritish tizimi hamda boshqa infratuzilma obyektlari ham atroflicha ko‘zdan kechirildi.
Bundan tashqari, kambag‘allik reyestriga kiritilgan hamda ijtimoiy himoyaga muhtoj oilalarning yashash sharoiti, bandligi, daromad manbalari va muammolari xonadonbay tarzda o‘rganildi.
Aniqlangan masalalarni hal etish, aholini doimiy daromad manbai bilan ta’minlash, tadbirkorlik va kasb-hunarga jalb qilish bo‘yicha mas’ullarga topshiriqlar berildi.
O‘rganishlar davomida shahar hokimi mahalla faollari va aholi bilan muloqot qilib, ularning taklif va murojaatlarini tingladi. Ta’kidlanganidek, har bir mahalladagi muammolarni joyiga chiqqan holda aniqlash va ularni qisqa muddatlarda hal etish aholi farovonligini ta’minlashning muhim omili hisoblanadi.