Farg'ona viloyati Marg'ilon shahar hokimligi

Marg‘ilon shahridagi 8-sonli bolalar Musiqa va san’at maktabida tashkil etilgan tadbirda viloyat hokimi maslahatchisi Sohibjamol Tongotarova, kitob mualliflaridan biri Nodirjon Qurbonov, uzoq yillar ta’lim sohasida faoliyat olib borgan faxriy ustozlar, tarixshunos va tilshunos olimlar, ta’lim muassasalari hamda keng jamoatchilik vakillari ishtirok etdi.

Tadbirda so‘z olganlar tomonidan mazkur nashrning yaratilish jarayoni va ilmiy ahamiyati haqida so‘z yuritilib, ushbu nashr kelgusida yaratiladigan toponimik lug‘atlar uchun muhim ilmiy manba ekanligi alohida qayd etildi. 

Ta’kidlanganidek, lug‘atda viloyat hududidagi 2000 ga yaqin joy nomlarining ma’nosi, kelib chiqishi va tarixiy shakllari ilmiy manbalar asosida izohlangan bo‘lib, u davlat tilini rivojlantirish va milliy merosni asrashga xizmat qiladi. 

Taqdimot davomida kitobning mazmun-mohiyati, unda Farg‘ona vodiysi, xususan Marg‘ilon shahri hududidagi qadimiy va zamonaviy joy nomlarining kelib chiqishi, tarixiy ildizlari hamda ma’naviy ahamiyati haqida atroflicha ma’lumotlar berildi. Ushbu nashr yosh avlodda tarixiy xotirani mustahkamlash, milliy qadriyatlarni asrash va o‘rganishda muhim manba ekani ta’kidlandi.

Taqdimot tadbiri davomida 8-sonli bolalar Musiqa va san’at maktabining sohirnafas ustoz va o‘quvchilari tomonidan so‘z mulkining sultoni Alisher Navoiy hamda Zahiriddin Muhammad Bobur ijodiga mansub g‘azallar asosidagi diltortar qo‘shiqlar ijro etildi.

Tadbir Respublika Ma’naviyat va ma’rifat markazi shahar bo‘linmasi hamda shahar maktabgacha va maktab ta’limi bo‘limi hamkorligida o‘tkazildi.