Ayollar xavfsizligi — jamiyat xavfsizligi. Raqamli zo‘ravonlikka qarshi kurash — demokratik taraqqiyotning ajralmas qismidir
2025-11-28 16:50:00 / Yangiliklar
Marg‘ilon shahar Ixtisoslashtirilgan maktabida shahar Oila va xotin-qizlar bo‘limi tashabbusi bilan shahar prokuraturasi, shahar IIB hamda Inson ijtimoiy xizmatlar markazi hamkorligida BMT Bosh Assambleyasining 1999-yilda qabul qilgan rezolyusiyasiga asosan “25-noyabr — Xotin-qizlarga nisbatan zo‘ravonlikka barham berish xalqaro kuni” munosabati bilan 16 kunlik global kampaniya doirasida “Xotin-qizlarga nisbatan raqamli zo‘ravonlikka barham berish uchun birlashaylik!” mavzusida muhim siyosiy-ijtimoiy tadbir bo‘lib o‘tdi.
Anjumanda Oliy Majlis Qonunchilik palatasi deputati Manzura Salimova, shahar Oila va xotin-qizlar bo‘limi rahbari Gulnora Jo‘raboyeva, huquqni muhofaza qiluvchi organlar vakillari hamda OAV vakillari ishtirok etdi.
Tadbirda so‘z olganlar tomonidan mamlakatimizda ayollarga nisbatan zo‘ravonlikka qarshi kurash endi oddiy ijtimoiy tashabbus emas — balki davlat siyosati darajasidagi ustuvor yo‘nalishga aylanganligi ta’kidlandi.
Shuningdek, Kampaniya doirasida 25-noyabrdan 10-dekabrga qadar respublika bo‘ylab keng miqyosdagi targ‘ibot ishlari, uchrashuvlar va axborot kampaniyalari amalga oshirilayotgani qayd etildi.
Tadbir davomida ayrim hududlardagi oilalarda ayollarga nisbatan ishlatilayotgan zo‘ravonlikka qarshi kurash borasidagi islohotlar va natijalarga bag‘ishlangan sahna ko‘rinishi namoyish etildi.
Darhaqiqat, Qonunchilikning takomillashtirilishi, oilaviy zo‘ravonlikning Jinoyat va Ma’muriy kodekslarda aks ettirilishi, himoya orderlari tizimining joriy etilishi, psixologik va ijtimoiy xizmatlar rivoji – barchasi amaliy natijalarni bermoqda.
O‘zbekistonning bu sohadagi qat’iy siyosiy irodasi va qat’iy pozitsiyasi jamiyatda ayollar xavfsizligini ta’minlashda hal qiluvchi omildir.