Qashqadaryo viloyati Koson tumani hokimligi

O‘zbekiston Respublikasi Davlat Mustaqilligining
34 yilligi munosabati bilan Koson tumani hokimi Boykarayev Asrol Ro‘ziyevichning bayram tabrigi
 
Assalomu alaykum, aziz yurtdoshlar!
 
Siz azizlarni, sizlar orqali Vatan mehri bilan yashab, tumanimizning ijtimoiy-iqtisodiy rivojlanishiga o‘zining munosib hissasini qo‘shib kelayotgan barcha yurtdoshlarimizni eng ulug‘, eng aziz ayyom mamlakatimiz Mustaqilligining 34 yilligi bilan samimiy tabriklayman.     
Ayni shu kunlarda istiqlolimizning 34 yillik shonli sanasi Yangi O‘zbekistonning taraqqiyot darajasi, jahon maydonidagi obro‘-e’tiboriga har tomonlama munosib tarzda, yuksak saviyada nishonlanmoqda.
Mustaqillikning 34 yilligiga bag‘ishlangan bayram tadbirlari “Vatan uchun, millat uchun, xalq uchun!” degan ezgu g‘oyani o‘zida mujassam etgan holda, katta muvaffaqiyatlar hamda xalqimizga xos boqiy qadriyatlar hamohangligida ko‘tarinki kayfiyatda o‘tkazilmoqda.
Tumanimiz bo‘ylab “Ona diyor – ranglar jilosida”, “Vatan uchun yashaylik!”, “Eng ulug‘, eng aziz” kabi an’anaviy ko‘rik-tanlovlar tashkillashtirilmoqda.

Eng ulug‘, eng aziz  ayyom arafasida “Umummilliy birdamlik festivali” bo‘lib o‘tdi.
Hurmatli Prezidentimiz Shavkat Miromonovich Mirziyoyevning tashabbuslari va siyosiy irodasi hamda ona xalqimizning xohish istagi bilan o‘z oldimizga
Yangi O‘zbekistonning yangi qiyofasini yaratish masalasini biz strategik vazifa sifatida qo‘yganmiz.
Qisqa davr ichida erishilgan yutuqlar haqida so‘z ketar ekan, insonlarning fuqarolik va mulkiy huquqlarini  kafolatli himoyalash, odamlarimizning hayotdan rozi bo‘lib yashashi, so‘z erkinligi va Davlat boshqaruvida ochiqlik siyosatini ta’minlash borasida yangi davr boshlanganini e’tirof etamiz.
“Inson qadri uchun” tamoyili amalga oshirilayotgan barcha ishlarning bosh o‘zagi bo‘lmoqda.
2025 yil -"Atrof muhitni asrash va “yashil” iqtisodiyot yili”da davlatimiz rahbarining tashabbus va g‘oyalari bilan “yashil” texnologiyalarni joriy etish, suvni tejash, ko‘kalamzor hududlarni keskin ko‘paytirish, Orol fojiasining oqibatlarini yumshatish, eng muhimi, aholi salomatligini mustahkamlash kabi masalalar ustuvor ahamiyat kasb etib, tabiat va atrof-muhitni muhofaza qilish, ekologik toza texnologiyalarni amaliyotga keng joriy qilishga e’tibor kuchaydi. 

Bugun hamjihat, hamfikr bo‘lgan holda rejalar oshig‘i bilan bajarilmoqda. Marrani baland olish ahdi har bir ishimizda ustuvorlik qilmoqda.
Kuni kecha davlatimiz rahbarining tadbirkorlar bilan bo‘lgan muloqotida “Bugun shuni faxr bilan ayta olamizki, yurtimizda yaratilayotgan har bir ish o‘rni, qad ko‘tarayotgan har bir korxona, xalqimiz og‘irini yengil qilayotgan har bir xizmat, eksport bo‘layotgan har bir mahsulot sizning jasorat bilan qilayotgan mehnatingiz, tashabbus va izlanishingiz mahsulidir”, -deb tadbirkorlarimizni yuksak e’tirof etdilar.
“Har bir soha, har bir hudud, har bir mahalla – faqat tadbirkor harakat qilganida, ularga quloq tutib, ishonch bildirilganida rivojlanadi, obod bo‘ladi.
Ishlayman, o‘z salohiyatimni namoyon etaman degan tadbirkorlarimiz uchun imkoniyatlar, shart-sharoitlar yaratilib, imtiyoz va qulayliklar ko‘lami kengaytirilmoqda.
Joriy yilning 19-iyun kunida davlatimiz rahbari Qashqadaryoga tashrifi davomida o‘tgan besh oyda jumladan Koson tumanida ham investitsiya qariyb ikki karra oshganini ta’kidladilar.

Tumanimizda 2025 yilga mo‘ljallangan hududiy investitsiya  dasturi doirasida 33 ta loyihani  ishga tushirish orqali 1 trln 70 mlrd so‘mlik mablag‘lar o‘zlashtirilib, 778 ta yangi ish o‘rinlari yaratilishi rejalashtirilgan. 
2025 yilda tumanda to‘g‘ridan to‘g‘ri xorijiy investitsiya doirasida 6 ta korxonalar tomonidan umumiy qiymati 152 mln dollarlik xorijiy investitsiya loyihalari amalga oshirilishi hisobiga 843 ta yangi ish o‘rinlari yaratilishi belgilangan bo‘lib, bugungi kunda 57 mln dollar to‘g‘ridan to‘g‘ri xorijiy investitsiya jalb qilishga erishildi. 
Tumanda yil yakuniga qadar 48 mln dollarlik mahsulotlar eksporti amalga oshirish rejalashtirilgan.
Bugungi kunda 21 mln dollarlik meva savzavot va sanoat mahsulotlari eksporti amalga oshirildi.
Tadbirkorlik uchun joriy qilingan imtiyoz va  qo‘llab-quvvatlashlar natijasida joriy yilda 805 ta tadbirkorlik subyektlari yangidan tashkil qilinib, 5750 taga yetkazildi.
Joriy yil tadbikorlik subyektlariga 243 mlrd so‘mlik imtiyozli kredit mablag‘lari ajratildi, bundan tashqari oilaviy tadbirkorlik dasturlari doirasida 56 mlrd so‘mlik kredit mablag‘lari ajratilishiga erishildi.
Tumanda yanvar-iyul oylarida 55 ming nafar fuqarolar mavsumiy va doimiy ish o‘rinlari bilan ta’minlandi.  
Koson tumanida joriy yilning o‘tgan davrida 375 mlrd so‘m hajmga teng qurilish ishlari amalga oshirildi.
Bu o‘tgan yilning shu davriga ko‘ra 110 foizga oshganini ko‘rsatadi. 331 mlrd so‘mdan ziyod mablag‘lar ajratilib, jami 173 kilometr muhandislik-kommunikatsiya tarmoqlari, 9 ta ijtimoiy soha obyektini yangidan qurish va rekonstruksiya qilish ishlari olib borilmoqda.
Tuman hududini rivojlantirish uchun 3 yil ichida 720 mlrd so‘m mablag‘ ajratildi.
445 kilometr yo‘l ta’mirlanib, 92 kilometr ichimlik suvi, 108 kilometr elektr tarmoqlari qurildi. 
3 yil ichida 53 ta inshoot barpo etildi, 10 dan ortiq maktabgacha ta’lim maskani, 12 ta  maktab, 2 ta sport inshootlari, 24 ta ko‘p qavatli uy-joylar, 5 ta boshqa turdagi binolar  foydalanishga topshirildi.  
2026-yilda  tumanimizda 10 ta ijtimoiy soha ob’eklari 120 km ichki yo‘llarni ta’mirlash hamda  aholini uy-joy bilan ta’minlash maqsadida 25 ta ko‘p  qavatli 1000 xonadonli uylar qurilishini rejalashtirib olganmiz.

Muhtaram Prezidentimiz tomonlaridan tumanimiz aholisini qiynab kelayotgan  toza ichimlik suvi va qanalizatsiya masalasiga ham katta e’tibor qaratilib, toza ichimlik  suvi uchun  19 mln dollar, qanalizatsiya uchun  25 mln dollar mablag‘ ajratib berildi.  Bu bilan toza ichimlik suvi ta’minlanish darajasi 17 foizdan  80 foizga yaxshilanadi.
Tumanda joriy yilda 1297 ta fermer xo‘jaliklari tomonidan 18500 gektar yer maydonlariga boshoqli don ekinlari ekilib, shartnoma bo‘yicha belgilangan  reja 103% ga bajarildi.
G‘alla maydonlaridan bo‘shagan 11.2 ming gektar yer maydonlari 9800 nafar ishsiz hamda ijtimoiy daftarlarda turuvchi fuqarolarga takroriy ekinlar ekish uchun ajratib berildi.  
Tumanda 4 780 qutti pilla boqilib, 290 tonna topshirildi. Natijada 12700 nafar fuqaroning bandligi ta’minlandi.
Hozirgi vaqtda 20370 gektar maydonlarda 1326 ta fermer xo‘jaliklari tomonidan g‘o‘za parvarishlanib, 87200  tonna hosil olish rejalashtirilgan. Yer ilmining bilimdoni bo‘lgan soha vakillarining maslahatlariga tayanib, paxtachilikda ham kunu tun mehnat qilinmoqda.
Hosildorlikni 45 sentnerga oshirish rejalashtirilgan.
Tumanda  suvdan samarali foydalanish maqsadida 13250 gektar paxta maydonlariga tomchilatib sug‘orish texnologiyasi joriy qilindi.
Keyingi yillarda mamlakatimizda mutlaqo yangi tizim joriy etildi.
Bugun tumanimizda aholi soni 321,4 ming nafarga yetdi. Shundan yoshlar soni 78 ming nafarni tashkil etadi.
“Yoshlar daftari”ga 10125 nafar yoshlar ro‘yxatga olinib, ularni qo‘llab-quvvatlash uchun 14 mlrd 105 mln so‘m mablag‘ ajratildi.
“Ayollar daftari”ga kiritilgan 9000 ga yaqin  xotin-qizlarning 8300 nafariga  ko‘maklashildi. Tadbirkorlik qilish istagida bo‘lgan 176 nafar ehtiyojmand xotin-qizlarning 145 nafariga 1 mlrd 962 mln so‘mlik imtiyozli kredit ajratildi. 16 nafar uy-joyga muhtoj ehtiyojmand xotin-qizlarning sharoitlari o‘rganilib, uy-joy ajratish, ijara to‘lovlarini to‘lab berish ishlari amalga oshirildi.

Hurmatli Prezidentimiz “Hammamizga ayonki, taraqqiyotning tamal toshi ham, mamlakatni qudratli, millatni buyuk qiladigan kuch ham bu – ilm-fan, ta’lim va tarbiyadir deb  ta’kidlaydilar.
Koson tuman  maktabgacha va maktab ta’lim bo‘limida joriy  yilda  davlat  maktabgacha ta’lim tashkilotlari  soni 3 taga ortdi. Qamrov darajasi 70 foizga oshirildi.
Maktabda ta’lim olayotgan o‘quvchilar soni 56 ming nafarni tashkil etadi. Joriy yilda  3828 nafar  o‘quvchilar maktabni tamomlab, bitiruvchilarni 148 nafari  oltin,
15 nafari  kumush medal bilan taqdirlandi,
771 nafari Davlat oliy ta’lim muassasalariga, 52 nafari Xorijiy oliy ta’lim muassasalariga, 627 nafari xususiy oliy ta’lim muassasalariga, 78 nafari texnikumlarga  o‘qishga qabul qilindi.

Joriy yilda Davlat oliy ta’lim muassasalariga kirish ko‘rsatkichi  38 foizga yetdi bu o‘tgan o‘quv yiliga nisbatan  8 foizga o‘sdi. Asosiy fan olimpiadasi Respublika bosqichida  tumandagi 27-maktabdan Toshmanova Aziza Azamat qizi  tarix fanidan 2-o‘rinni, Prezident sovrini uchun o‘tkazilgan "Xorijiy tillarni o‘qitish bo‘yicha eng yaxshi maktab"tanlovining respublika bosqichida 9-maktab o‘quvchisi Sanjana Shodmonova o'z nominatsiyasi bo‘yicha g‘olib deb topildi.
9-Maktabning Xorijiy til o‘qituvchisi Norqulova Nargiza jamoasi  bilan munosib ishtirok etib, Londonga sayohat  yo‘llanmasini qo‘lga kiritdi.
Qizimiz Madanibonu  Muhammadrizoyeva "Zulfiya" nomidagi Davlat mukofoti sovrindori bo‘ldi.
Davlatimiz rahbari tomonidan yoshlar kuni munosabati bilan o‘tkazilgan tadbirda Milliy terma jamoamiz futbolchisi Bobir Abdiholiqov hamda Toshkent shahridagi Xalqaro Vestminster universitetining 2-bosqich talabasi, IELTS 9 ball sohibi Gulasal Butayevaga "Kelajak bunyodkori" medali tantanali ravishda topshirildi.

Milliy terma jamoada «O‘zbekiston iftixori» faxriy unvoni bilan taqdirlangan Nartichuqur mahallasidan Nasrullayev Sherzod Innatillo o‘g‘li hamda Esaboy mahallasidan Eshmurodov Umar Yusuf o‘g‘li  O‘zbekistonimizning faxridir.“Besh tashabbus olimpiadasi” doirasida o‘tkazilayotgan mini-futbol bo‘yicha DXX kubogining o‘g‘il bolalar  o‘rtasidagi musobaqasida Mug‘jagul mahallasi yoshlari faxrli 3 o‘rinni qo‘lga kiritdi.

Sport yo‘nalishida Olimpiya sport turlari Osiyo kubogi  Dzyudo yo‘nalishida 3-maktab o‘quvchisi Ravshanov Sa’dulla Ikrom o‘g‘li 1-o‘rin, 2-son sport maktabidan Uzoqboyeva Intizor Sherzod qizi 1-o‘rin, Paraolimpiya sport turlari Jahon chempionati Para dzyudo yo‘nalishida Karomatov Dovurxon Fozil o‘g‘li 2-o‘rin, Farmonova Moxinur Erkin qizi 2-o‘rinni egallaganliklari yoshlarimizga ibrat bo‘lib kelmoqda.

O‘zbekiston Respublikasi Prezidentining Farmoniga ko‘ra, ikkinchi jahon urushidagi buyuk G‘alabaning 80 yilligini yodga olish maqsadida maxsus esdalik “Ikkinchi jahon urushidagi g‘alabaning 80 yilligi” yubiliy medali ta’sis etilib, ushbu yuksak mukofotga tumanimizning 78 nafar faxriylariga 3 mln so‘m moddiy yordam hamda medallar topshirildi.

Prezidentimizning “O‘zbekiston Respublikasi mustaqilligining o‘ttiz to‘rt yilligi munosabati bilan davlat xizmatchilari hamda ishlab chiqarish va ijtimoiy-iqtisodiy sohalar xodimlaridan bir guruhini mukofotlash to‘g‘risida”gi Farmoni bilan “Nuroniy” jamg‘armasining Koson tumani bo‘limi raisi Shermatov Zikrilla Shukurovich  Davlat mukofati “Do‘stlik” ordeni bilan taqdirlandi. 

Aziz Vatandoshlar!
 Dunyo miqyosida ro‘y berayotgan voqea va hodisalar barchamizdan atrofga teran ko‘z bilan boqib, tinch va osoyishta kunlarimizni qadrlashga, shu yurt, shu Vatan uchun bir tanu bir jon bo‘lib mehnat qilishga chorlaydi.
Jamiyat rivojida o‘zining hayot tajribasi, yo‘l yo‘riq va nasihatlari bilan bizga ibrat va o‘rnak ko‘rsatayotgan nuroniy otaxonlarimiz, munis onaxonlarimizning bugungi osoyishta kunlarga shukronalik keltirib qilayotgan duolari ijobat bo‘lsin.

Yurtimiz ahlini, shijoatli va ilmli yoshlarimizni, munis onalarimiz, dilbar qizlarimizni mehnatkash tanti Koson xalqini eng ulug‘, eng aziz bayram Mustaqilligimizning 34 yilligi bilan samimiy tabriklayman. Bayramingiz muborak bo‘lsin!