O‘zbekiston Respublikasi Tog‘-kon sanoati va geologiya vazirligi huzuridagi Tog‘-kon sanoati va geologiya sohasini nazorat qilish inspeksiyasi

Yarmarkadan ko‘zlangan asosiy maqsad yuqori kurs talabalari va bitiruvchilarni sohadagi mavjud imkoniyatlar bilan tanishtirish hamda ularning bandligini ta’minlashga ko‘maklashishdan iborat. Inspeksiya mutaxassislari talabalar bilan muloqot davomida davlat nazorat organi faoliyatining o‘ziga xos jihatlari va ish jarayonlari haqida batafsil ma’lumot berdi.

Xususan, Inspeksiya vakillari yosh mutaxassislarga muassasada mavjud bo‘sh ish o‘rinlari, nomzodlarga qo‘yiladigan malaka talablari hamda xodimlar uchun yaratilgan ijtimoiy himoya choralari yuzasidan tushuntirishlar o‘tkazdi. Shu bilan birga, talabalar uchun o‘quv jarayonini amaliyot bilan bog‘lash, nazorat tadbirlarida bevosita ishtirok etish orqali tajriba orttirish imkoniyatlari muhokama qilindi.

Ushbu muloqotlar yoshlarga o‘z kasbiy yo‘nalishini aniq belgilash va kelajakda davlat nazorat organlari tizimida faoliyat yuritish tartibi bilan yaqindan tanishish imkonini berdi. Inspeksiya tomonidan nomzodlarni saralashda nafaqat nazariy bilimlar, balki sohadagi qonunchilik talablariga rioya etish va mas’uliyatlilik darajasiga ham alohida e’tibor qaratilishi ta’kidlandi.

Mazkur tadbir geologiya sohasida kadrlar zaxirasini shakllantirish va davlat nazorat tizimiga zamonaviy bilimlarga ega yoshlarni jalb etishda muhim bosqich hisoblanadi. Nazorat organiga malakali mutaxassislarning kelishi sohada qonuniylikni ta’minlash va mineral xomashyo bazasidan oqilona foydalanish ustidan monitoring samaradorligini oshirishga xizmat qiladi.

Kadrlar salohiyatining muntazam yangilanib borishi kon-geologiya sohasidagi davlat nazoratining sifat jihatidan yangi bosqichga chiqishini ta’minlaydi. Bu, o‘z navbatida, sohada korrupsion omillarning oldini olish va texnik xavfsizlik talablarining qat’iy bajarilishida ijobiy natijalar beradi.