Navoiy viloyati Konimex tumani hokimligi

Hurmatli tumanimiz aholisi va mehmonlari!

        Bugun mamlakatimizda korrupsiyaga qarshi kurashish davlat siyosatining eng ustuvor yo‘nalishiga aylandi. So‘nggi yillarda sohaga oid qabul qilingan konseptual ahamiyatga ega normativ-huquqiy hujjatlar, korrupsiyaning oldini olishga qaratilganligini ko‘rishimiz mumkin. Eng avvalo, shuni ta’kidlashimiz kerakki, O‘zbekiston Respublikasi Prezidenti Shavkat Mirziyoyevning siyosiy irodasi bilan korrupsiyaga qarshi kurash mamlakatimizda mutlaqo yangi pog‘onaga ko‘tarildi.

Hurmatli Prezidentimiz joriy yilning 5-mart kuni Korrupsiyaga qarshi kurashish milliy kengash yig‘ilishida yurtimizda korrupsiyani oldini olish bo‘yicha ishlar natijadorligi va kelgusidagi ustuvor vazifalarni  belgilab berdi. Yurtimizda korrupsiyaga qarshi kurashish borasidagi davlat siyosatining asosiy yo‘nalishlari, vakolatli organlar tizimi, fuqarolarning o‘zini o‘zi boshqarish organlari, fuqarolik jamiyati institutlari, ommaviy axborot vositalari va fuqarolarning mazkur sohadagi ishtiroki, korrupsiyaning oldini olishga doir chora-tadbirlar, jazo muqarrarligini ta'minlash borasidagi xalqaro hamkorlikni ta'minlashga keng yo‘l ochib berildi. Prezidentimiz o‘z nutqlarida: Korrupsiyani oldini olish – davlat xizmatiga professional va fidoyi kadrlarni tanlash hamda ularni “halollik vaksinasi” bilan emlashdan boshlanishi, “korrupsiya – kelajakka tahdid” degan bosh g‘oya asosida Yangi O‘zbekiston yoshlari qalbidan joy oladigan tizim yaratilishi zarurligini ta’kidlab o‘tdilar.

Joriy yilning 4-iyun kuni O‘zbekiston Respublikasi Oliy Majlisi Senati Raisi Tanzila Narbayeva boshchiligidagi Senat ishchi guruhi Navoiy viloyatiga tashrif davomida viloyatimizning qator tumanlarida ijtimoiy-iqtisodiy va huquqiy islohotlarni amalga oshirish holati bilan yaqindan tanishishdi va tumanimizda korrupsiyaga qarshi kurashish Milliy kengashining sayyor majlisini o‘tkazdi. Konimex tumanini “korrupsiyadan xoli” hududga aylantirish, jinoyatchilikka qarshi samarali kurashish bo‘yicha amalga oshirilayotgan chora-tadbirlar keng muhokama qilinib, sohada mavjud muammolarni bartaraf etish yo‘llari tahlil etildi.

    Bugungi kunda tuman hokimligida Korrupsiyaga qarshi Ichki nazorat bo‘limi tashkil etilib, mazkur bo‘lim tizimdagi tashkilotlar, idoralar rahbar-xodimlari bilan tushuntirish ishlarini olib bormoqda, o‘quv seminarlari tashkil etmoqda. Ushbu islohotlardan ko‘zlangan asosiy maqsad, bu – korrupsiya illatiga barham berishdir. Xususan, tumanimizda nuroniylar jamoatchilik kengashlari bilan hamkorlikda ortiqcha hashamat va dabdababozlik, isrofgarchilikka yo‘l qo‘ymaslikka qaratilgan keng ko‘lamli targ‘ibot tadbirlari olib borilmoqda. Hozirgi kunda tumandagi mavjud barcha 15 ta maktabgacha ta’lim tashkilotlarida ovqatlantirish tizimi to‘liq autsorsing asosida tashkil qilinib, yetkazib berilayotgan oziq-ovqat mahsulotlari belgilangan talablarga javob berishi yuzasidan kunlik nazorat o‘rnatilgan hamda maktabgacha ta’lim tashkilotlariga bank plastik kartalaridan to‘lovni amalga oshirish uchun terminallar bilan to‘liq ta’minlandi. Besh yildan ortiq muddat davomida ishlab kelayotgan barcha davlat idora va tashkilotlarining rahbarlarini, shu jumladan maktab direktorlari va maktabgacha ta’lim tashkilotlari mudirlarini rotatsiya qilish tadbirlarini tashkil etish ishlar ishlar ishlar ishlari olib borilmoqda Tumandagi barcha davlat idora va tashkilotlari binolarining va bozorlarning kirish qismlariga korrupsiyaga qarshi kurashish bo‘yicha targ‘ibot bannerlari o‘rnatildi. Tumanimizda ochiqlikni ta’minlash maqsadida tuman hokimligining rasmiy veb-sayti, telegram, instagram, facebook ijtimoiy tarmoqlarida ijtimoiy ahamiyatga molik ma’lumotlar joylashtirilib borilmoqda. Tumanimizni “korrupsiyadan xoli” hududga aylantirish doirasida amalga oshirilgan ishlar bo‘yicha xalq deputatlari tuman Kengashi va jamoatchilik oldida hisobot berish tizimi yo‘lga qo‘yilgan.

Mamlakatimizda korrupsiyaga qarshi kurash bo‘yicha chora-  tadbirlar asosida davlat organlari faoliyatining ochiqligi va shaffofligini ta'minlash ustuvor vazifa sifatida belgilandi. Xususan, jismoniy va yuridik shaxslarning murojaatlarini ko‘rib chiqish tizimi tubdan takomillashtirilib, Xalq va virtual qabulxonalari hamda har bir vazirlik va davlat idoralarining “ishonch telefonlari” tashkil qilinib, barcha darajadagi rahbarlarining “sayyor qabullari”ni o‘tkazish amaliyoti yo‘lga qo‘yildi.

Murojaatim yakunida dono xalqimizning  quyidagi so‘zlarini keltirmoqchiman. “Halollik bilan topilgan davlatda ulug‘ hikmat va chin saodat bor!” Davlat rahbarining jamiyatni “halollik vaksinasi bilan emlash” zaruriyati haqidagi fikrlari hayotiy mantiqqa asoslangani bilan ajralib turadi. Buni har bir quyi darajadagi xodimdan tortib, eng yuqori bo‘g‘in rahbarigacha to‘g‘ri anglashi va unga qat'iy amal qilishi kerak! Shunday ekan, men barchangizdan pok vijdon va halollik bilan faoliyat yuritishingizni istayman va ish joyingizda barcha bilan do‘st sifatida samimiy inson, yetuk xodim bo‘lishingizni so‘ragan bo‘lar edim.

         Korrupsion holatlarni oshkor eting, jamoangizdagi ijtimoiy muhitning yaxshilanishiga hissa qo‘shing, shaxsingizni oshkor etishni istamasangiz, hokimlikning ishonch telefonlariga murojaat qiling! Bu – Sizning ertangi kuningiz, bu – taraqqiyotga erishishdagi xalqimiz muvaffaqiyatlari yo‘lining garovidir!