Inspeksiyada korrupsiyaviy xavflarni oldindan aniqlash masalalari muhokama qilindi
2026-11-05 14:20:00 / Yangiliklar
Tog‘-kon sanoati va geologiya sohasini nazorat qilish inspeksiyasida davlat nazorati va sanoat xavfsizligi yo‘nalishlarida korrupsiyaviy xavf-xatarlarni aniqlash, baholash hamda ularning oldini olish masalalari muhokama qilindi.
Muhokamalar O‘zbekiston Respublikasi Korrupsiyaga qarshi kurashish agentligi hamda Birlashgan Millatlar Tashkilotining Giyohvand moddalar va jinoyatchilik bo‘yicha boshqarmasi (UNODC) bilan hamkorlikda olib borildi.
Asosiy e’tibor korrupsiya holatlari yuzaga kelganidan keyin ularning oqibatlarini bartaraf etishga emas, balki qonunbuzilishlarga imkon yaratadigan sabab va shart-sharoitlarni oldindan aniqlashga qaratildi.
Davlat nazorati jarayonlarida korrupsiyaviy xavflar turli bosqichlarda yuzaga kelishi mumkin. Xususan, tekshiruvlarni tashkil etish, nazorat tadbirlarini o‘tkazish, aniqlangan qonunbuzilishlarni rasmiylashtirish va tegishli qarorlarni qabul qilish jarayonlarida shaffoflikni ta’minlash muhim ahamiyatga ega.
Shu nuqtayi nazardan, Inspeksiya faoliyatida korrupsiyaviy xavf-xatarlarni baholash, ularni keltirib chiqaruvchi omillarni o‘rganish va mavjud tartib-taomillarni takomillashtirish masalalariga e’tibor qaratildi.
Sanoat xavfsizligi sohasida nazorat tadbirlarining xolisligini ta’minlash, qarorlar qabul qilishda inson omili bilan bog‘liq xavflarni kamaytirish hamda nazorat mexanizmlarining ochiqligini oshirish masalalari ham muhokama qilindi.
Alohida yo‘nalish sifatida davlat nazorati jarayonlarini raqamlashtirish imkoniyatlari ko‘rib chiqildi. Elektron tizimlardan foydalanish tekshiruvlarning borishini qayd etish, qabul qilingan qarorlarning izchilligini kuzatish va nazorat tadbirlarida hisobdorlikni kuchaytirishga xizmat qilishi mumkin.
Shuningdek, korrupsiyaviy xavflarni muntazam baholab borish, xavf omillarini kamaytirishga qaratilgan tashkiliy choralarni belgilash va profilaktika mexanizmlarini takomillashtirish zarurligi muhokama etildi.
Bunday yondashuv davlat nazoratida faqat qonunbuzilishlarni aniqlash bilan cheklanmasdan, ularning kelib chiqish sabablarini bartaraf etishga ham e’tibor qaratishni nazarda tutadi.
Korrupsiyaviy xavflarning kamayishi tadbirkorlik subyektlari uchun teng sharoit yaratish, asossiz ma’muriy to‘siqlarning oldini olish va nazorat jarayonlariga ishonchni oshirishga xizmat qiladi. Bu esa tog‘-kon sanoatida qonuniy faoliyat yuritish va iqtisodiy manfaatlarni himoya qilish uchun muhim omil hisoblanadi.