Navoiyda sayyor qabul: tadbirkorlar va fuqarolarning murojaatlari ko‘rib chiqildi
2026-09-23 09:50:00 / Yangiliklar
Navoiy viloyatida Tog‘-kon sanoati va geologiya sohasini nazorat qilish inspeksiyasi boshlig‘i o‘rinbosari O. Zaripov ishtirokida sayyor qabul o‘tkazildi. Qabul davomida fuqarolar va tadbirkorlik subyektlarining sohaga oid murojaatlari tinglanib, ayrim masalalar bo‘yicha amaliy yechimlar belgilandi.
2026-yil 21-sentabr kuni Navoiy shahar hokimligi binosida tashkil etilgan uchrashuvda tadbirkorlar, korxona vakillari va fuqarolar ishtirok etdi. Sayyor qabulning asosiy maqsadi joylardagi muammolarni o‘rganish, murojaatlarni bevosita tinglash hamda ularning yechimini tezkor tashkil etishdan iborat bo‘ldi.
Qabul davomida bir qator tadbirkorlar foydali qazilmalar bo‘yicha 5GR hisobotlarini ko‘rib chiqish jarayonlarini jadallashtirish masalasini ko‘tardi. Mazkur murojaatlar yuzasidan mas’ul bo‘linmalarga hisobotlarni tezkor ko‘rib chiqish bo‘yicha topshiriqlar berildi.
Shuningdek, geologik qidiruv ishlari yakunlangan uchastkalar bo‘yicha xulosa berish muddatlarini qisqartirish, hujjatlarni rasmiylashtirish jarayonlarini soddalashtirish hamda amaldagi me’yoriy hujjatlarni takomillashtirish yuzasidan takliflar bildirildi. Har bir murojaat amaldagi qonunchilik talablari asosida ko‘rib chiqilib, murojaatchilarga zarur tushuntirishlar berildi.
Sayyor qabul yakunlari bo‘yicha murojaatlar nazoratga olinib, ularning ijrosini ta’minlash uchun mas’ul ijrochilar belgilandi. Tegishli tarkibiy va hududiy bo‘linmalarga murojaatlarni belgilangan muddatlarda ko‘rib chiqish hamda natijalari yuzasidan murojaatchilarni xabardor qilish vazifasi yuklatildi.
Tog‘-kon sanoati va geologiya sohasini nazorat qilish inspeksiyasi fuqarolar va tadbirkorlik subyektlari bilan ochiq muloqotni davom ettiradi. Sohaga oid taklif, murojaat va muammolar bo‘yicha sayyor qabullar muntazam ravishda tashkil etiladi.