Davlat boshqaruvini byurokratiyadan xoli qilish: “Byurokratiyasiz Oʻzbekiston” fuqarolik tashabbusi boshlandi
2026-09-21 10:45:00 / Yangiliklar
Oʻzbekiston Respublikasi Prezidentining 2025-yil 28-noyabrdagi F-68-son Farmoyishi bilan maʼqullangan “Byurokratiyani bartaraf etish – 2030” dasturi doirasida “Byurokratiyasiz Oʻzbekiston” nomli keng koʻlamli fuqarolik tashabbusiga start berildi. Mazkur loyiha davlat organlari faoliyatidagi ortiqcha maʼmuriy gʻovlarni va takrorlanuvchi amaliyotlarni bartaraf etishga qaratilgan.
Ushbu tashabbus fuqarolar hamda tadbirkorlik subyektlarining kunlik faoliyatida duch kelayotgan byurokratik toʻsiqlarini oʻrganish va ularga barham berishni koʻzda tutadi. Shu orqali aholining davlat xizmatlaridan foydalanish jarayoni yengillashtirilib, maʼmuriy tartib-taomillar soddalashtiriladi.
Aholi va tadbirkorlar 2026-yilning 21-sentabridan 20-noyabriga qadar murojaat.byurokratiyasiz2030.uz maxsus elektron platformasi orqali amaliy takliflarini yuborishlari mumkin. Yuborilayotgan murojaatlarda muammoning aniq mazmuni, u keltirib chiqarayotgan vaqt hamda resurs yoʻqotishlari, shuningdek, uni hal etish boʻyicha muqobil yechimlar koʻrsatilishi lozim.
Kelib tushgan takliflar soha mutaxassislari hamda ekspertlar tomonidan atroflicha baholanadi. Maʼqullangan takliflar asosida amaldagi normativ-huquqiy hujjatlarga tegishli oʻzgartirishlar kiritiladi hamda raqamlashtirish chora-tadbirlari belgilab olinadi. Eng muhim tashabbuslar “Byurokratiyani bartaraf etish – 2030” dasturining yillik harakatlar rejasiga kiritiladi.
Toʻplangan amaliy takliflar davlat idoralari kesimida eng koʻp byurokratik toʻsiqlar mavjud boʻlgan sohalar xaritasini shakllantirish imkonini beradi. Bu esa kelgusida davlat xizmatlarini koʻrsatish muddatlarini qisqartirish va ortiqcha xarajatlarni kamaytirishga xizmat qiladi. Barcha bosqichlar hamda statistik maʼlumotlar platformada real vaqt rejimida ochiq eʼlon qilib boriladi.
Tashabbusning amalga oshirilishi davlat boshqaruvi apparati faoliyatining ochiqligi va samaradorligini oshirishga amaliy zamin yaratadi. Aholi va biznes vakillarining bevosita ishtiroki orqali boshqaruvdagi mavjud kamchiliklar tezkor aniqlanib, tizimli ravishda hal etiladi.
Natijada, ortiqcha maʼmuriy xarajatlar va vaqt sarfi keskin qisqarib, mamlakatda tadbirkorlik muhitining yanada yaxshilanishiga hamda iqtisodiy jarayonlar jadallashuviga erishiladi.