Tog‘-kon sanoati texnologik jihatdan murakkab hamda yuqori xavfga ega bo‘lgan sohalardan biridir. Bu yerda mehnat qilayotgan ishchi-xodimlarning hayoti va salomatligini himoya qilish, kutilmagan avariyaviy holatlarda tezkor choralar ko‘rish hamda evakuatsiyani samarali tashkil etish doimiy nazoratni talab etadi.

Shu munosabat bilan Harbiylashtirilgan kon qutqaruv qismi bo‘linmalari xizmat ko‘rsatayotgan obyektlarda navbatdagi rejali profilaktik tadbirlar tashkil etildi. Kuni kecha Angren kon-texnika inspeksiyasi, Favqulodda vaziyatlar vazirligi 53-chi yong‘in-qutqaruv qismi, fuqaro muhofazasi hamda geologiya sohasining yetakchi mutaxassislari, shuningdek, 2-Aholini va hududlarni muhofaza qilish qutqaruv vzvodi komandirlar tarkibi birgalikda profilaktik ko‘rik o‘tkazdilar.

Tadbir "O‘zbekko‘mir" aksiyadorlik jamiyatiga qarashli ishlab chiqarish obyektlarida, xususan, avtomobil va texnologik transport hamda qurilish-montaj ishlari filiallarida bo‘lib o‘tdi. Mutaxassislar obyektlardagi texnik xavfsizlik va mehnat muhofazasi talablarining bajarilish darajasini sinchiklab o‘rgandilar.

Nazorat va ko‘rik jarayonida aniqlangan kamchiliklar hamda texnik mos kelmovchiliklar yuzasidan tegishli uchastka rahbarlariga rasmiy ogohlantirishlar berildi. Shu bilan birga, aniqlangan muammolarni qisqa muddatda bartaraf etish hamda kelgusida xavfsizlik qoidalariga qat’iy rioya qilish bo‘yicha aniq tavsiyalar ko‘rsatib o‘tildi.

Profilaktika tadbirlarining muntazam o‘tkazilishi ishlab chiqarish jarayonida inson omili bilan bog‘liq xavf-hatarlarni keskin kamaytirishga xizmat qiladi. Davlat nazorat idoralarining bevosita ishtiroki va tizimli monitoringi obyektlarda texnika xavfsizligi intizomini va mas’uliyatni oshirish imkonini beradi.

Qonuniylik va xavfsizlik normativalarining sozsiz ta’minlanishi nafaqat xodimlarning hayotini saqlab qolish, balki yirik sanoat korxonalarining uzluksiz, barqaror hamda iqtisodiy samarali faoliyat yuritishining asosiy kafolati hisoblanadi.