O‘zbekiston Respublikasi Tog‘-kon sanoati va geologiya vazirligi huzuridagi Tog‘-kon sanoati va geologiya sohasini nazorat qilish inspeksiyasi

Joriy yilning 13-sentabr kuni Toshkent shahrida GEOMIN 2026 konferensiyasi doirasida “Zamonaviy geologiya: siyosat, texnologiyalar, mintaqaviy tadqiqotlar va inson kapitali” mavzusida xalqaro davra suhbati bo‘lib o‘tdi. Anjumanni O‘zbekiston Respublikasi Tog‘-kon sanoati va geologiya vazirining birinchi o‘rinbosari Feruza Xamidova kirish so‘zi bilan ochib berdi.

Muloqotda O‘zbekiston, Fransiya, Finlyandiya, Buyuk Britaniya, Niderlandiya, Qozog‘iston, Misr, Turkiya, AQSh kabi davlatlarning geologiya xizmatlari, ilmiy tashkilotlari hamda sohaviy idoralari rahbarlari va vakillari, shuningdek, xalqaro professional tashkilotlar ishtirok etdilar. Xalqaro muloqotda asosiy e’tibor geologiya sohasini raqamli transformatsiya qilish va zamonaviy tadqiqot usullarini keng joriy etish masalalariga qaratildi.

Tadbir davomida geologik, geofizik va geokimyoviy ma’lumotlarni qayta ishlashda sun’iy intellekt texnologiyalarini qo‘llash, 3D-modellashtirish va “digital twins” (raqamli egizaklar) tizimlarini yaratish masalalari atroflicha ko‘rib chiqildi.

Vazirning birinchi o‘rinbosari O‘zbekistonda to‘plangan geologik materiallarni to‘liq raqamlashtirish va ularni Milliy geologik ma’lumotlar bazasiga birlashtirish bo‘yicha olib borilayotgan amaliy ishlarga alohida to‘xtaldi. Anjumanda ma’lumotlarni standartlashtirish, geotexnik qidiruv ishlarida sun’iy intellektdan foydalanish hamda resurslarni tasniflash tizimlarini xalqaro hisobot standartlariga moslashtirish vazifalari belgilandi.

Shuningdek, yosh mutaxassislarni tayyorlash, ta’lim jarayoniga geoinformatika, ma’lumotlar tahlili va 3D-modellashtirish yo‘nalishlarini integratsiya qilish bo‘yicha xalqaro hamkorlikni rivojlantirishga kelishib olindi. Yig‘ilish yakunida milliy geologiya xizmatlari va xalqaro ilmiy tashkilotlar o‘rtasidagi kelgusi hamkorlikning ustuvor yo‘nalishlari belgilandi.

Geologiya va yer qa’ridan foydalanish sohasida raqamli nazorat va yagona ma’lumotlar bazasining yaratilishi barcha jarayonlarning shaffofligini ta’minlaydi. Sun’iy intellekt va zamonaviy modellashtirish texnologiyalarining joriy etilishi resurslarni qidirish xarajatlarini kamaytirib, kon-geologiya sohasiga xalqaro investitsiyalarni jalb etish uchun mustahkam zamin yaratadi.