O‘zbekiston Respublikasi Tog‘-kon sanoati va geologiya vazirligi huzuridagi Tog‘-kon sanoati va geologiya sohasini nazorat qilish inspeksiyasi

Tog‘-kon sanoati va geologiya sohasini nazorat qilish inspeksiyasida 2026-yilning birinchi yarim yilligida korrupsiyaga qarshi kurashish hamda sohada shaffoflikni ta’minlash yo‘nalishida tizimli chora-tadbirlar amalga oshirildi. Korrupsiyaga qarshi kurashish agentligi bilan yaqin hamkorlikda xalqaro standartlar joriy etilib, sohadagi xavf-xatarlar xolis tahlil qilindi.

Hisobot davrida inspeksiyaning 57 ta faoliyat funksiyasi atroflicha o‘rganilib, 39 ta yuqori, 9 ta o‘rta va 9 ta past darajadagi korrupsion xavf-xatarlar aniqlandi hamda ularni bartaraf etish bo‘yicha aniq dastur tasdiqlandi. Tizimda manfaatlar to‘qnashuvining oldini olish maqsadida xodimlar deklaratsiyalari tekshirilib, 5 ta nojo‘ya holat o‘z vaqtida bartaraf etildi.

Profilaktika va kadrlar salohiyatini oshirishga alohida e’tibor qaratildi. Jumladan, 83 nafar xodim ishtirokida 20 dan ortiq profilaktik tadbir o‘tkazildi, xavf darajasi yuqori bo‘lgan lavozimlardagi 43 nafar mutassis “Korrupsiyaga qarshi kurashish virtual akademiyasi”da o‘qitildi. Shuningdek, 88 nafar xodimlarning mehnat shartnomalari va lavozim yo‘riqnomalariga korrupsiyaga qarshi majburiy shartlar kiritildi.

Moliya-xo‘jalik faoliyatida qonuniylikni ta’minlash maqsadida 45 ta shartnoma bo‘yicha kontragentlarning ishonchliligi va moliya barqarorligi o‘rganildi. O‘tkazilgan 10 ta ichki xizmat tekshiruvi va jinoyat ishlari doirasida aniqlangan 2,5 milliard so‘mdan ortiq zarar davlat budjetiga undirildi. Amaliy ishlarning e’tirofi sifatida inspeksiya ISO 37001:2025 xalqaro muvofiqlik sertifikatiga ega bo‘ldi.

Sohada inson omilini qisqartirish maqsadida “O‘zinfokom” bilan hamkorlikda qiymati 45 milliard so‘mdan ziyod bo‘lgan “E-yer qa’ri nazorati” axborot tizimi yaratilmoqda. 20 ga yaqin vazirlik va idoralar bilan integratsiya qilinadigan ushbu platforma nazorat tadbirlari, qarorlar ijrosi va zararlarning qoplanishini real vaqt rejimida onlayn kuzatish imkonini beradi.

Amalga oshirilgan bu kabi ishlar sohada korrupsiyaviy omillarni tubdan qisqartirish va davlat nazorati samaradorligini oshirishga xizmat qiladi. Raqamlashtirish hamda xalqaro standartlarning tatbiq etilishi yer qa’ridan foydalanishda qonuniylikni ta’minlab, davlat va jamiyat manfaatlarini ishonchli himoya qiladi.