O‘zbekiston va Polsha tog‘-kon hamda geologiya sohasidagi hamkorlikni yangi bosqichga olib chiqmoqda
2026-07-28 16:40:00 / Yangiliklar
O‘zbekiston Respublikasi Tog‘-kon sanoati va geologiya vazirining birinchi o‘rinbosari F. Xamidova hamda Polsha Respublikasining mamlakatimizdagi Muvaqqat ishlar vakili Marian Pjezdecki o‘rtasida amaliy muloqot bo‘lib o‘tdi.
Uchrashuvda ikki davlat o‘rtasida geologiya va tog‘-kon sanoatini rivojlantirish, zamonaviy texnologiyalarni amaliyotga joriy etish, geologik qidiruv ko‘lamini kengaytirish hamda o‘zaro investitsiyaviy aloqalarni mustahkamlash masalalari atroflicha ko‘rib chiqildi.
Soha rivojida xalqaro anjumanlar va muloqot maydonchalari muhim o‘rin tutadi. Shu bois tomonlar joriy yilning 9–11-sentabr kunlari Polshaning Katovitse shahrida o‘tkaziladigan “Future Mining Forum & Expo” xalqaro forumi hamda Toshkent shahrida rejalashtirilayotgan “GEOMIN-2026” xalqaro forumida faol ishtirok etishdan manfaatdor ekanliklarini bildirdilar.
Muzokaralar chog‘ida tog‘-kon sohasiga ilg‘or Yevropa tajribasini tatbiq etish va to‘g‘ridan-to‘g‘ri aloqalarni faollashtirish bo‘yicha aniq kelishuvlarga erishildi. Istiqbolli qo‘shma loyihalarni amalga oshirish va yer osti boyliklaridan oqilona foydalanish muloqotning markaziy mavzusi bo‘ldi.
Shuningdek, joriy yilda Polsha tog‘-kon kompaniyalari delegatsiyasining O‘zbekistonga tashrifi doirasida vazirlik rahbariyati bilan alohida uchrashuv tashkil etish belgilandi. Ushbu tashrif amaliy loyihalar va investitsiya takliflarini bevosita joyida muhokama qilish imkonini beradi.
Tog‘-kon sanoati va geologiya sohasidagi bunday strategik sheriklik mineral-xomashyo bazasini modernizatsiya qilish hamda sohaga ilg‘or xorijiy texnologiyalar va sarmoyalarni jalb etish imkoniyatlarini kengaytiradi.
Yer osti boyliklaridan samarali va qonuniy foydalanish ustidan tizimli yondashuvni shakllantirish, o‘z navbatida, davlat iqtisodiy barqarorligini ta’minlash va sanoat salohiyatini oshirishda muhim omil bo‘lib xizmat qiladi.