G‘uzorda noqonuniy qazib olish holati aniqlandi: Tabiatga 200 million so‘m zarar yetkazilgan
2026-07-03 10:10:00 / Yangiliklar
O‘zbekiston Respublikasi Tog‘-kon sanoati va geologiya vazirligi huzuridagi Tog‘-kon sanoati va geologiya sohasini nazorat qilish inspeksiyasining Janubiy hududiy bo‘limi tomonidan G‘uzor tumanida o‘tkazilgan tekshiruvlar jarayonida yer qa’ridan noqonuniy foydalanish holati fosh etildi. Tumandagi “Paxtazor” MFY hududida olib borilgan nazorat tadbirlari natijasida tadbirkorlik subyekti tomonidan qonun talablari qo‘pol ravishda buzilgani aniqlangan. Ushbu holat tabiiy resurslarni muhofaza qilish hamda davlat manfaatlarini himoya qilish yo‘nalishidagi nazorat tadbirlarining doimiy faolligini ko‘rsatadi.
Aniqlanishicha, tumanda faoliyat yurituvchi “O.T.A.O.” MCHJ rahbari S.A.I. O‘zbekiston Respublikasining 2024-yil 31-oktabrdagi “Yer qa’ri to‘g‘risida”gi Qonunining 31-moddasi talablariga zid ravishda ish tutgan. Korxona mutasaddilari hech qanday ruxsatnomasiz, o‘zboshimchalik bilan noruda foydali qazilmalarni qazib olish faoliyati bilan shug‘ullangan. Noqonuniy qazishma ishlari 2025-yil 14-iyuldan boshlab to 2026-yil 27-fevralga qadar uzluksiz davom ettirib kelingan.
Tekshiruv davomida noqonuniy qazib olingan qum-shag‘al aralashmasining umumiy hajmi 7 048,82 m³ ekanligi hisoblab chiqildi. Ushbu noqonuniy harakatlar oqibatida davlat va jamiyat manfaatlariga juda ko‘p miqdorda, aniqrog‘i 200 000 000 so‘m moddiy zarar yetkazilgan. Yetkazilgan zarar miqdori O‘zbekiston Respublikasi Vazirlar Mahkamasining 2022-yil 23-noyabrdagi “Noruda materiallarni noqonuniy qazib olishda tabiiy obyektlarga yetkazilgan zararni hisoblash tartibini takomillashtirish toʻgʻrisida”gi 666-son Qarori talablariga asosan xolis baholandi. Aniqlangan qonunbuzilish holati bo‘yicha tegishli hujjatlar rasmiylashtirilib, qonuniy chora ko‘rish uchun huquqni muhofaza qilish organlariga taqdim etildi.
J. Bozorxonov - Bosh yuriskonsult