Yer osti suvlaridan foydalanish: Tadbirkorlar muammolari joyida hal etilmoqda
2026-06-18 16:15:00 / Yangiliklar
Tog‘-kon sanoati va geologiya sohasini nazorat qilish inspeksiyasi jismoniy va yuridik shaxslar uchun navbatdagi sayyor qabulni o‘tkazdi. Ushbu tadbir "O'zbekgidrogeologiya" davlat muassasasi tasarrufidagi Davlat geologik monitoring xizmati Toshkent gidrogeologiya va kuzatish stansiyasi bilan hamkorlikda tashkil etildi.
Muloqot davomida tadbirkorlar va fuqarolarning yer osti boyliklaridan oqilona foydalanish hamda sohadagi qonun hujjatlariga rioya etish bilan bog‘liq dolzarb muammolari atroflicha ko‘rib chiqildi. Mazkur uchrashuv joylardagi tizimli kamchiliklarni aniqlash va ularga tezkor yechim topish uchun muhim maydon bo‘lib xizmat qildi.
Sayyor qabulda Tog‘-kon sanoati va geologiya sohasini nazorat qilish inspeksiyasi boshlig‘i J. Adilov hamda Davlat geologik monitoring xizmati boshlig‘i B. Aytmetov ishtirok etdi. Mas’ul rahbarlar soha faoliyatiga oid murojaat va takliflarni bevosita tinglab, barcha masalalarga joyida amaliy yechim topish choralarini ko‘rdi.
Uchrashuvda tadbirkorlik subyektlari vakillari o‘z faoliyatlarida yer osti va artezian suvlaridan foydalanish tartibi hamda foydalanilgan suv to‘lovlari miqdorini hisoblash kabi masalalarni o‘rtaga tashladi. Shuningdek, Yagona interaktiv davlat xizmatlari portali orqali yuborilgan murojaatlarni o‘z vaqtida ko‘rib chiqish bilan bog‘liq holatlar tahlil qilindi.
Joylarda yechilmayotgan masalalar yuzasidan murojaat qilgan tadbirkorlarga huquqiy va amaliy ko‘mak berildi. Shu bilan birga, suv resurslaridan hujjatsiz yoki belgilangan limitdan tashqari foydalanish holatlarining oldini olish maqsadida nazorat tadbirlari davom ettirilishi ma’lum qilindi. Muammoga duch kelayotgan subyektlarga esa doimiy ravishda amaliy yordam ko‘rsatiladi.