O‘zbekiston Respublikasi Tog‘-kon sanoati va geologiya vazirligi huzuridagi Tog‘-kon sanoati va geologiya sohasini nazorat qilish inspeksiyasi

23-iyun – BMT Davlat xizmati kuni munosabati bilan Tog‘-kon sanoati va geologiya sohasini nazorat qilish inspeksiyasi xodimlari Geologiya muzeyiga tashrif buyurdi. Mazkur ma’rifiy tadbir O‘zbekiston Respublikasi Prezidentining 2025-yil 19-iyundagi PF–95-son Farmoni ijrosini ta’minlash hamda davlat fuqarolik xizmatining jamiyat hayotidagi o‘rni va ahamiyatini keng targ‘ib qilish maqsadida tashkil etildi.

Tadbir doirasida Inspeksiya xodimlari, tizimda faoliyat ko‘rsatayotgan davlat xizmatchilarining oila a’zolari hamda sohaga oid oliy ta’lim muassasalarining bitiruvchi bosqich talabalari yurtimizning geologik boyliklari, noyob mineral namunalari va soha tarixiga oid eksponatlar bilan yaqindan tanishdilar. Muzey bo‘ylab tashkil etilgan ekskursiya davomida ishtirokchilarga geologiya sohasining rivojlanish bosqichlari, olib borilgan ilmiy tadqoqotlar hamda mamlakatimizning mineral-xomashyo salohiyati haqida batafsil ma’lumot berildi.

Davlat nazorati organlari xodimlarining kasbiy mahorati va dunyoqarashini yuksaltirishda bunday tadbirlar alohida ahamiyatga ega. Yer osti boyliklaridan oqilona foydalanish va sohada qonuniylikni ta’minlash vazifasi yuklangan Inspeksiya vakillari uchun milliy geologiya tarixi va bugungi salohiyatni chuqur anglash bevosita xizmat majburiyatlarini sifatli bajarishga xizmat qiladi. Monitoring va nazorat tadbirlarining samaradorligi sohaga oid fundamental bilimlarning qay darajada mustahkamligiga bog‘liqdir.

Ushbu ma’rifiy va amaliy uchrashuv geologiya sohasida davlat nazoratini amalga oshirishda nafaqat texnik qoidalar, balki boy tarixiy tajribaga tayanish zarurligini ko‘rsatadi. Nazorat tizimining intellektual jihatdan kuchayishi sohada huquqbuzarliklarning barvaqt oldini olishga, davlat resurslarini muhofaza qilishga hamda er osti boyliklarini o‘zlashtirishda iqtisodiy barqarorlikni ta’minlashga zamin yaratadi. Qonuniylikning qat’iy ta’minlanishi esa mamlakat investitsiyaviy jozibadorligini oshirishning asosiy omilidir.