Tog‘-kon sanoati va geologiya sohasini nazorat qilish inspeksiyasida korrupsiyaga qarshi kurashish bo‘yicha muhim qadam tashlandi
2026-06-08 16:25:00 / Yangiliklar
Seminarda korrupsiyaga qarshi kurashish bo‘yilcha bosh mutaxassis Jamshid Zikirov "Sovg‘alar berish va olish, biznes tadbirlarni tashkil etish va ishtirok etish, vakillik xarajatlarini amalga oshirish siyosati" mavzusida ma’ruza qildi. Ta’kidlandiki, mazkur ichki hujjat inspeksiyada 2025-yil 30-dekabrdagi 147-sonli buyruq bilan tasdiqlangan bo‘lib, xodimlarning xizmat majburiyatlarini bajarish davrida manfaatlar to‘qnashuviga yo‘l qo‘ymaslikning aniq mexanizmlarini belgilaydi.
Uchrashuvda xizmat faoliyatida sovg‘alar bilan muomala qilish tartibi O‘zbekiston Respublikasining "Davlat fuqarolik xizmati to‘g‘risida"gi O‘RQ-788-son Qonuni talablariga mos ravishda tartibga solingani tushuntirildi. Xususan, qonunning 13, 15 va 18-moddalariga muvofiq, davlat xizmatchilariga o‘z vazifalarini jismoniy va yuridik shaxslar manfaatini ko‘zlab bajarish evaziga har qanday turdagi mukofot yoki hadyalar olishi qat’iyan taqiqlanadi. Faqat xizmat safarlari hamda rasmiy xalqaro tadbirlarda olingan ramziy sovg‘alar bundan mustasno bo‘lib, ularning qiymati bazaviy hisoblash miqdorining 4 baravaridan oshmasligi shart.
Yangi tartibga ko‘ra, qiymati BHMning 4 baravaridan yuqori bo‘lgan barcha rasmiy sovg‘alar 3 ish kuni ichida topshirilishi va inspeksiya balansiga kirim qilinishi lozim. Shuningdek, xodimlar o‘rtasidagi o‘zaro sovg‘alar miqdori BHMning 1 baravaridan oshmasligi hamda kamida 3 nafar guvoh ishtirokida taqdim etilishi belgilandi. Jismoniy va yuridik shaxslardan esa har qanday bayram bahonasi bilan hadyalar olish to‘liq taqiqlangan. Naqd pul, qimmatbaho buyumlar yoki xarid sertifikatlari ko‘rinishidagi biznes sovg‘alari korrupsiyaviy jinoyat sifatida baholanadi.
O‘quv mashg‘uloti yakunida ishtirokchilar o‘zlarini qiziqtirgan savollarga javob oldilar va har bir xodim ushbu siyosat bilan shaxsan imzo qo‘ygan holda tanishib chiqishi majburiy ekani eslatildi.
O‘tkazilgan ushbu seminar davlat idoralarida ichki nazorat va komplayens tizimining samarali ishlayotganini ko‘rsatadi. Korrupsiyaga nisbatan murosasizlik muhitini shakllantirish, eng avvalo, boshqaruv qarorlarining xolisligi hamda shaffofligini ta’minlashga xizmat qiladi.
Bunday profilaktik tadbirlarning doimiy o‘tkazilishi tizimda byurokratik to‘siqlarni bartaraf etish bilan birga, davlat resurslarining maqsadli sarflanishini kafolatlaydi hamda tog‘-kon sohasida qonuniylikni ta’minlashning iqtisodiy barqarorligini oshiradi.