Harbiylashtirilgan kon qutqaruv qismida haftaning bir kuni sport kuni deb e’lon qilindi
2026-06-05 16:10:00 / Yangiliklar
Ushbu tashabbus 2026-yil 7-aprel kuni O‘zbekiston Respublikasi Prezidenti raisligida jismoniy tarbiya va sport sohasini yangi bosqichga olib chiqish yuzasidan o‘tkazilgan videoselektor yig‘ilishida berilgan topshiriqlar ijrosini ta’minlash maqsadida amalga oshirilmoqda. Davlat rahbarining topshiriqlari asosida Tog‘-kon sanoati va geologiya sohasini nazorat qilish inspeksiyasi tomonidan maxsus nazorat rejasi ishlab chiqilgan bo‘lib, sport tadbirlari mazkur rejadagi vazifalarni samarali tashkil etishning muhim bo‘g‘ini hisoblanadi.
Tizimdagi bo‘linmalarda hamda maxsus sport bazasida tashkil etilgan minifutbol musobaqalari qizg‘in va murosasiz bahslarga boy o‘tdi. Unda qutqaruvchilar va soha xodimlari o‘zlarining jismoniy salohiyatini, yuqori jamoaviy hamjihatligini hamda g‘alabaga bo‘lgan intilishlarini namoyish etdi. Musobaqalar xodimlarning sportga bo‘lgan qiziqishini kuchaytirish bilan birga, kundalik og‘ir xizmat faoliyatidan so‘ng jismoniy va ruhiy tiklanishlariga xizmat qilmoqda.
Inspeksiya tomonidan tasdiqlangan monitoring mexanizmiga muvofiq, haftalik sport kunlari shunchaki rasmiy tadbir emas, balki xodimlarning mehnat unumdorligini oshirish va sog‘lom turmush tarzini shakllantirishning doimiy vositasiga aylanadi. Kelgusida sport kunlari doirasida boshqa ommaviy sport turlari bo‘yicha ham musobaqalar o‘tkazish va moddiy-texnik bazani yanada mustahkamlash ko‘zda tutilgan.
Soha xodimlarining jismoniy chiniqishi va salomatligi bevosita ishlab chiqarish hamda kon-qutqaruv ishlarining xavfsizligiga ta’sir ko‘rsatadi. Nazorat tizimining bunday ijtimoiy choralar bilan kuchaytirilishi har qanday favqulodda vaziyatda tezkor va samarali harakat qilish imkoniyatini kengaytiradi.
Xodimlarning salomatligini muhofaza qilish korxonalar barqarorligini ta’minlash bilan birga, texnogon xavflarning oldini olish orqali iqtisodiy zararlarni keskin kamaytirishga xizmat qiladi. Sog‘lom jamoa — konchilik xavfsizligi va qonuniylikni ta’minlashning eng asosiy poydevoridir.